Kon SOP giyatakan, kuwarta maoy hinungdan

Kada dagkong kompaniya, institusiyon o balay-patigayon labi na sa  kasino, diin adunay sensitibo kaayong trabaho ang mga empleyado (bangkero/card dealer) nga naasayin sa mga talad-dulaanan, kinsa makagunit kanunayg dinagkong kantidad sa chips ug kuwarta, sila pirmeng gitudloan-gipahimangnoan nga kinahanglan tumanon gyod ang Standard Operations Procedure sa kompaniya.

Kay kon kini supakon, delikado nga kadudahang may gibuhat silang maot, diin mosangko sa ilang pagkasuspenso o masibak pa, kay nawad-an nag pagsalig ang management. Maong importante gyong sundon ang SOP sanglit nagprotehir kini sa interest sa balay.

Sa casino god, ultimong pagbalasa-pagpasulod-pagpagawas sa baraha gikan sa shoebox hangtod ngadto sa paghatag niini ngadto sa mga nanagdula, adunay SOP nga gisunod ang card dealer.

Kana lang sa dulang blackjack, gidid-an ang dealer nga alsahon ang baraha. Hinunoa, kinahanglang isalyid kini sa layout paingon sa hand or slot nga may patad. Rason? Aron dili masilip-makita unsay numero sa maong card.

Hasta diha sa pag-inilisay sa kuwarta ngadto sa chips, o panahon sa kinabigay-binayranay na sa mga patad nga nangapilde ug midaog, may sagradong SOP usab nga gipatuman. Samtang nagpaabot sa resulta sa dula, dili makaduladula ang dealer sa giatubang niyang house chips, kinahanglang nakahayang-abli kanunay iyang mga palad aron ipakita sa nagbantayng CCTV nga wala kini sulod.

Hunahunaa lang. Ultimong chips mahulog sa salog, kinahanglang ipahibalo kini sa area security or gaming area supervisor, ayha pa mapunit ug ibalik sa chiprack.

Ug namatud-an ang kaepektibo ning maong SOP. Sanglit, ubay-ubay ang nagmasinupakon nga nasakpang nangawat, mipasag chips sa customer ug nakigkonsabo sa kustomer. Hinungdan, sa dihadiha nilang pagkapapha!

Atong Kongreso, Senado, Department of Justice, DILG, Korte Suprema ug ang International Criminal Court (ICC) may iyaiya pong SOP nga gipasunod nila sa katawhan ug dapat hugtanong sundon sab sa maong mga institutsiyon.

Ug natuman ba nila kini niadtong adlawng gitugyan-harapharapang gipakidnap without mercy si kanhi Presidente Rodrigo Roa Duterte sa sungayang CIDG chief Nicholas Torre III ngadto sa Interpol paingon sa langyawng ICC, The Hauge, Netherlands? Kay kon walay bisan usa kanila ang mituman sa SOP, aw, klaro na kaayo nga ilang giyatakan ang kasagrado niini ug sa unsay nagpahiping hinungdan?

Luoya gyod natong Pinoy, uy!