Mga hulga ug gasto ni Sara
Wala pa gani kapakita og ebidensiya sa giangkon nga hulga batok sa iyang kinabuhi, si Bise Presidente Sara Duterte nitiyabaw na sab, sa walay paghisgot og bisan unsang sukaranan, nga dunay hulga sa pagpatay sa iyang amahan nga si kanhi Presidente Rodrigo Duterte.
Kuwestiyonable nang daan ang giingong hulga batok niya kay wala dasoni sa mga sakop sa Vice Presidential Security and Protection Group (VPSPG). Mas kadudahan pa gyod ang iyang pasidaan batok sa kanhi presidente nga patyon sama ni anhing Senador Ninoy Aquino kon mamugos sa pagpauli.
* * *
Ang VPSPG naglakip sa dul-an sa 400 ka mga sundawo ug mga polis. Maoy labing unang ma-alarma ug motaho dayon sa ilang kadagkoan sa Armed Forces of the Philippines (AFP) ug Philippine National Police (PNP) kon may hulga batok sa ilang gibantayan nga bise presidente.
Pero ang AFP ug PNP nideklarar nga wala silay nahibaw-an nga bisan unsang hulga batok sa bise presidente ug sa mga sakop sa iyang pamilya. Ug hangtod karon, upat ka buwan human nihimo sa pasangil, ang bise presidente wala kapakita og ebidensiya sa hulga.
* * *
Kalibogan ang mga hulga nga gimugna sa bise presidente:
Ang giingong hulga batok sa iyang kinabuhi, bisan wala pa mapahibawo sa iyang mga guwardiya, gihimo nang rason sa paghulga niadtong Nobyembre nga patyon silang Presidente Ferdinand Marcos Jr., House Speaker Martin Romualdez ug First Lady Liza Araneta Marcos; ug
Ang giingong hulga batok sa iyang amahan mapatuman kon mopauli ang kanhi presidente (nga dili makagawas sa prisohan sa The Hague pinaagi sa pagpamugos, kon dili pinaagi lang sa lisod mahitabo nga interim release o pagka-absuwelto sa International Criminal Court).
* * *
Para sa bise presidente, hingpit ang iyang katungod sa pagpasangil og bisan unsa (nga masulod sa iyang ulo) batok ni bisan kinsa (nga kalagotan niya). Maong dili angayng hasulon sa pagmatuod sa iyang mga pasangil.
Walay kalainan sa iyang pagtuo nga, kay 32 milyones ang nibotar niya sa 2022, samang silay nagdominar sa Davao City sa 37 na ka tuig, hingpit ang iyang gahom paghurot sa buhis sa katawhan. Ug dili makapaningil og kuwentada ang Commission on Audit (COA), Kongreso ug bisan ang impeachment court.
* * *
- Latest
