Apas sumpay nga mga pahiumdom kalabot sa pribadong pagpadayag

Ang mga pribadong pagpadayag pagahukman kun nahiuyon ba kini sa pagpadayag alang sa tanan (public revelation) nunot niini atong pagaisipon nga mahinungdanon kining mosunod:

1.   Nahiuyon ba kini sa Balaang Kasulatan.

2.  Si Kristo ba ang nahimong sentro niini. Usa ka dakong makuyaw kun ang maong pribadong pagpadayag ang nagsalindot kang Kristo Jesus.

3.  Likayan ug matngongan ang mensahe niini labina kun nagtanyag kini og laing laraw nga sukwahi sa laraw sa kaluwasan nga gikan kang Kristo Jesus ug natudlo kanato sa Simbahan o mga pagtulon-an nga lahi sa pagtulon-an sa ebanghelyo. Dili man hinuong mga debosyon nga atong gibansay (popular devotions) ang nagagikan sa mga pribadong pagpadayag apan angayan natong hinumdoman nga kining mga debosyon kinahanglang magsukad ug anaa sa landong sa pagtuo nga gitudlo sa Simbahan, alayon sa Public Revelation ug si Kristo ang nahimong sentro niini. Diha sa atong pagsabot sa pribadong pagpadayag atong hinumdoman nga ang pagtuo nato ingon nga simbahang Katoliko ang dili man pagasukdon diha sa mga pribadong pagpadayag. Makatabang tuod sila sa pagpalawom sa pagtuo apan gikinahanglan ang kalam ingon man pagkamabinantayon aron sa ingon pagaisipon nga kasaligan ug katuohan ang “pagkamakadiyosnon” sa usa ka balansayon ug debosyon. (cf, CDF Message of Fatima, 121).

Sa susamang paagi ang Kristohanong Pagtuo ang dili mahimong modawat sa mga pagpadayag nga nilabaw sa Pagpadayag nga si Kristo Jesus mao na ang katumanan, sama sa gihimong pagpangangkon sa ubang mga relihiyon o mga sekta nga nagsukad sa maong mga matang sa pagpadayag. (CCC 67).

Mga mahinungdanong termino

1.  Not Worthy of Belief. Constat de non Supernaturalitate sa laktod nga pagkasulti dili gikan sa Dios. Sanglit dili man gikan sa Dios adunay kahigayonan nga maisip nato kining usa ka matang sa panglingla ug pagpangilad o dili ba kaha gikan sa kaaway nga mao ang yawa.

Mao kini ang matang sa termino nga gigamit sa Vatican Congregation of the Doctrine of the Faith niadtong giisip nga aparisyon nga nahitabo niadtong tuig 1948 sa Carmelite Monastery sa Lipa, Batangas ngadto sa usa ka nobisyada nga si Teresing Castillo, (cf. Protocol 224/1949 gipagawas niadtong Disyembre 11, 2015). Kini nagsaysay:

“Matud pa nga human sa makuting pagsusi sulod sa duha ka mga tuig ug segun sa mga panahom sa mga eksperto ug teologo ingon man sa mga asoy sa mga saksi ang Supreme Congregation of the Holy Office, napamatud-an nga walay sambog nga supernatural sa maong hitabo kondili nagasukad lamang sa mga natural nga mga hinungdan ug sukaranan sa ato pa pagaisipon kining Constat de non supernaturalitate.  Sa ato pa dili tinuod. Ang CBCP sa panahon ni Orlando Quevedo, OMI, DD isip chairman sa Episcopal Commission on the Doctrine of the Faith niadtong Hulyo 11, 2018 ang nipagawas og dokumento: “Pastoral Instructions on the Devotion to our Lady of Mediatrix of All Grace on Lipa and Local Interpretations ang nihatag ning maong mga pamahayag kalabot sa maong Monasteryo sa Lipa

a. Kini dili supernatural

b. Ang maong hitabo dili tinuod.

Kuyog usab ning maong sanglitanan ang mga 54 ka mga aparisyon sa Mahal nga Birhen Maria ngadto kang Ida Peerdeman ingon nga Our Lady of All Nations kun Senyora sa Tanang mga Nasud nga nahitabo niadtong mga tuig 1945-1959 ang dili tinuod. (CDF Notifications niadtong Mayo 25, 1974).