EDITORYAL — Responsableng paggamit sa social media

Think before you click. Mao kini ang pahinumdom ni National Bureau of Investigation Director Jaime Santiago sa mga netizens nga iresponsableng nigamit sa social media apil na ang pagpakatap og mga fake news, misinformation, disinformation ug makasakit sa ubang tawo.

Kini may labot sa pagka-aresto sa usa ka babayeng taga Oslob nga tuyong ni-usab sa quote card sa News5 bahin sa pamahayag ni Presidente Ferdinand Marcos Jr.batok sa problema sa ilegal nga drugas sa nasud. Iyang gipun-an ang gipamulong sa presidente nga nigawas na hinuong gusto sa pangulo nga dunay pandayong balaod aron himuong legal ang ilegal nga drugas. Kaso lang, ang mismong taga News5 nakabantay sa pagkatap niini hinungdan nga nidangop sila sa NBI.

Magsilbi unta kining leksyon ug pasidaan sa tanang netizens, vlogger man o dili. Mahimo untang responsable sa ilang mga gipang-post, gipang-share diha sa social media.

Dili matawag nga pagyatak sa katungod sa kagawasan sa pagpadayag kining pag-aresto sa maong vlogger.

Kun ang gi-post i para mangdaut sa uban, pagpanghadlok, pagpanghulga, pagpanghasi , aron magmugna og kasamok sa nasud, duna gyuy tulobagon sa balaod ang nag-post kay dili man maayo ang tumong sa iyang post.

Ang kagawasan sa pagpadayag adunay dakong kaakohan. Butang nga wala sa mga nagpasad karong mga political vloggers sa social media nga klarong mga trolls sa mga politiko nga ang tumong mao ang pagdaot sa kaatbang ug pagpanindot sa pangalan sa mga nagsuhol kanila.

Sa panahon karon nga ang teknolohiya nagpasayon sa kinabuhi sa mga tawo, makapaabot sab kining mga tighimo og mga fake news nga gamiton kini batok kanila sa mga otoridad.