EDITORYAL - Unsa man gyuy tinuod?

Nilusad og tulo ka adlaw nga transport strike sa tibuok nasud ang mga drayber ug operator sa mga public utility jeepneys (PUJ) sugod kagahapong adlaw tungod sa matud pa walay klarong direksyon sa public utility vehicle modernization program (PUVMP).

Gibanabanang moabot 100,000 ka mga PUJs ang mosalmot niini, apan sagad niini kadtong mga karaan nga mga pasaheroan ug dili ang mga modernong pasaheroan.

Namasangil si Manibela chairman Mar Valbuena nga dunay mga iregularidad sa consolidation records nga gi-report sa Land Transportation Franchising and Regulatory Board (LTFRB) nga nakaapekar sa panginabuhian sa mga jeepney drivers.

Kaning isyuha dugay na kaayo ni, hangtud karon wala pa gihapon mahuman. Para man unta ni sa kaayohan sa tanan, gikan sa sumasakay hangtud sa mga drayber ug sa mga operators.

Pero unsa man gyud kahay bug-at nga rason nganong naglisod man sila pagporma og kooperatiba nga tanan gipaubos man og trainings ug seminars kabahin ani ?

Sa isyu sab bahin sa giingong iregularidad sa consolidation record, unsa man gyuy tinuod, daghan na ang nagporma og kooperatiba itandi sa mga wala pa o bali?

Unya unsa may epekto diay ani ngadto sa panginabuhian sa mga jeepney drivers?

Makadaghan na nagbutang og deadline ang Department of Transportation (DOTr) agi konsiderasyon para niadtong wala pa gihapon maka-consolidate, apan wala pa gihapon mahuman.

Unsa man gyuy plano sa DOTr ug mga transport groups nga wala pa ma consolidate? Nganong mura man og nagpaugat paminawon ang mga nahitabo karon, kay mas daghan pa ang di modernized PUJ, pwedeng gamiton ilang gidaghanon aron i-pressure ang gobiyerno?

Dili ba mismo si Presidente Ferdinand Marcos Jr. na maoy miingon nga ang deadline, deadline gyud ilabi na mas daghan ang mga nagpa consolidate nga mga drayber, unsa man gyud? Karon ang DOTr miingon nga hinayhinayan nalang ang modernisasyon, sa ato pa nitahan sila sa demand sa mga drayber nga nagpaugat?