Dili kasinahan si Sara
Bisan sa pagyaka ni Senate President Chiz Escudero sa impeachment trial ni Bise Presidente Sara Duterte, nimubo ang paghuwat sa mga magbubuhis kay mas dugay'ng magsugod ang husay sa iyang amahan sa International Criminal Court (ICC):
• Gipahibawo ni Escudero nga sa Hunyo 2 magtigom ang impeachment court ug sa Hulyo 30, duha ka adlaw human sa State of the Nation Address ni Presidente Ferdinand Marcos Jr., magsugod ang husay; samtang
• Gitakda sa ICC ang husay pagtuki unsa kalig-on ang mga ebidensiya batok ni kanhi Presidente Rodrigo Duterte sa Septiyembre 23.
* * *
Bisan wala pay husay, salamat ni kanhi Commissioner Heidi Mendoza sa Commission on Audit, nahagsa nang usa sa panagang sa bise presidente sa gikuwestiyong gasto sa P612.5 milyones niyang confidential funds (CF) sa Office of the Vice President ug Department of Education sa 2022 ug 2023.
Dili nang kalusot ang bise presidente nga mga alyas ang mga ngalan sa nakadawat sa CF nga wala igkita sa database sa Philippine Statistics Authority (PSA). Kay segun ni Mendoza wala silang kasumiter sa importanteng panginahanglan: lista sa tinuod nilang mga ngalan.
* * *
Ambot unsaon pagpasabot sa bise presidente ang mga ngalan nga gibahin sa House panel of prosecutors sa nagkalainlaing grupo:
• Piattos Gang (naglakip nilang Mary Grace Piattos, Pia Piatos-Lim ug Renan Piatos);
• Dodong Gang (Dodong Alcala, Dodong Bina, Dodong Darong, Dodong Bunal, Dodong Barok ug Dodong S.);
• Baho Gang (Amoy Liu, Fernan Amuy ug Joug De Asim); ug
• Chichiriya-Phone Gang (Fernando Tempura, Raymunda Jane Nova, Chippy McDonald, Carlos Miguel Oishi, Jay Kamote, Miggy Mango ug Xiame Ocho).
* * *
Kapait sa gidangatan sa atong buhis. Gawas nga gidudahang nisimang sa pribadong mga bulsa, kay wala man mapangutana sa mga kongresista ang duha ka security officers sa bise presidente–Koronel Raymund Dante Lachica ug Koronel Dennis Nolasco–kinsay ilang gihatagan sa kuwarta, gibugalbugalan pa gyod ang paghimo sa pekeng mga resibo. Gawas sa pagkapriso sa iyang amahan sa The Hague, sa kalisod paghimo og kuwentada sa iyang CF ug sa nag-ung-ong nga pag-abli sa ilang joint bank accounts nga gidudahang dunay binilyon ka pesos, maoy pipila lang sa mga rason nga dili kasinahan ang kahimtang sa bise presidente karon.
* * *
- Latest
