Walay kahadlok ang mga dautan

Kong kaniadto dili gyud ta magpanghadlok bisan magabhian ta sa kadalanan kay lagi nadugay sa pag uli sa trabaho o eskwela kay nangawagtang man kadtong mga kriminal kay nagtago tago human nangahadlok sa kamot nga puthaw sa nakalabay nga administrasyon, apan karon lahi man ang atong pamati kay nerbyuson naman ta kay wala namay kasegurohan kong safe ra o dili na.

Sama nalang sa usa ka lalaking naglakaw sa daplin sa karsada sa Basak Pardo sa dakbayan sa Sugbo niadtong kaadlawon sa Biyernes nga gihunongan sa mga lalaki nga nagsakay og duha gyud ka motorsiklo, partner-partner sila sa motor nga ilang gisakyan ug ang usa ka angkas ang nikanaug og miapas sa biktima dayon gitionan sa armas ug gikuha ang cellphone ug ang bag niini sayon sibat sakay sa motor nga nagpaabot.

Dili maklaro ang nawong sa mga hinampak kay nag full-face helmet man sila, bisan nakuhaan og CCTV footage ang ilang pagpanulis nga milanat lang og sais segundos base sa monitoring sa Barangay Basak Pardo, dali ra kaayo.

Nasayran nga usa sa mga suspek nalambigit sa illegal nga drugas kaniadto apan natokhang og nipahuway sa iyang dautang binuhatan. Apan karon nahibalik na usab dili lang sa drugas kon dili sa pagpanulis na aron masuportahan seguro ang bisyo. Kayahan seguro ning mga tawhana kay ka afford man og motor o basin kinawat pud nila.

Ang nahitabo sa Basak Pardo usa lang sa mga krimen nga napagya kay nakuhaan man og CCTV apan duna matud pay daghang nabiktima nga wala lang mo-report sa mga otoridad. Samtang laing krimen nga nahitabo gyud sulod mismo sa balay sa Dios, gikawat tanan ang microphone nga gigamit sa mga choir sa San Lorenzo Ruiz Parish sa Baranggay Tisa Cebu City. Nanguros pa human sa iyang gibuhat. Pastilan.

Ingon na niini ka gahi ang mga dautang elemento karon nga bisan ang balay sa Ginoo biktimahon pa man. Nganong nahitabo kini? Tungod sa posibleng nawagtang na ang ilang paminsar kay naguba na sa illegal nga drugas.

Nigara pagbalik kining mga kriminal kay gihatagan man sila og importansiya kay gipanalipdan man ang ilang tawhanong katungod apan ang naapike ani karon ang mga inosenti nilang biktima.

Usa sa dili ikalimod nga kabilin sa kanhi administrasyong Duterte ang peace of mind sa katawhan kay nangawagtang man ang mga kriminal. Kutob nalang kita sa pangindahay ug paghandum niini nga mora’g kuli na natong matagamtanan kay luag kaayo ang guberno sa pagsanta kanila. Duna may mga programa batok kanila apan kaya ra kaayo kini sa mga dautan kay igo ra man sila prisohon ug mas mosamot sila kamangtas sa sulod sa bilibid kay padayon man ang ilang binuhatan. Nahunong naman ang pagbanaw sa dugo sa mga dautan, apan karon nakaginhawa na sila ug nakatigom na og igong kusog pagsabwag sa ilang kadautan.

Dakong hagit sa mga otoridad ang pagsumpo kanila kay dili naman makagamit sa kamot nga puthaw pagdisiplina kanila. Mag amping nalang gyud ta.