Inig-Pasko wa na’y lami ang mga Christmas songs

Ambot ngano’ng nagdali ang mga mall ug mga estasyon sa radio ug television nga pagsugod g’yud sa giingon nga “ber” months, upat ka bulan una mag-Pasko, sige na sila’g patukar sa mga alawiton sa Pasko.

September pa, mag-Silent Night na, mag-White Christmas na. Walay kahulogan, walay epekto, kay lagi layo pa kaayo ang Pasko. Ambot unsay ilang gidalian?

Hinungdan nga inig-Pasko, samot ka wala nay epekto ang maong mga Christmas songs, kay puol na. Tiaw mo’y upat ka bulan ang atong pagpinaminaw niini.

Sa akong pagpanakay sa barko isip apprentice mate, ang among rota sa Sweet Lines: Cebu, Tagbilaran, Lazi, Plaridel, Iligan, Kolambogan ug Ozamis.

Nahinumdom ko nga December 1, didto kami sa pantalan sa Tagbilaran ug ang among radio operator nagpatukar sa “I’ll be home for Christmas”. Una’ng higayon nga nakadungog mi og Christmas song.

Mingaw kaayo, bisag duol ra ang Tagbilaran, apan, away from home. Sa ato pa, miepekto kanamo ang kahulogan sa alawiton sa Pasko. Apan karon, Septiyembre pa, bisa’g tua ka pa sa Saudi Arabia, unya makadungog ka’g Christmas Song, di ka mingawon uy.

Unya, inig Pasko na g’yud, ordinaryo na kaayo’ng paminawon ang maong mga alawiton sa Pasko. Puol na.

Anyway, ila sad na. Ug puslan man … Merry Christmas in advance.

* * *

Taliwa sa mga pagsaway sa taga-oposisyon, ang World Bank mi-approve sa 141 million US dollars alang sa Bus Rapid Transit [BRT] system dinhi sa Sugbo. Ang atong kagamhanan mobutang og counterpart nga 87.5 million US dollars.

Sa ato pa, mahinayon g’yud ang maong proyekto, ang una’ng BRT system sa nasud. Dili nato kalimtan nga sugyot ug ideya kini ni kanhi mayor Tomas Osmeña ug gisuportahan ni Mayor Mike Rama. Di ba kaha ni maka-unite sa duha ka leader?

Ang 23 ka kilometro nga dalan nga agian sa BRT magbalikbalik sa rota Bulacao-Talamban, ug makapasakay og 330,000 ka pasahero matag adlaw. Nag-una sa Brazil, ug karon ang BRT nag-operate na sa -150 ka dakbayan sa nagkalainlaing nasud sa kalibutan.

“ We Cebuanos are proud to have the first BRT in the country, a system that has proven to be effective in providing safer, faster, and more comfortable mode of transport to millions of commuters in many cities in both developing and developed countries,” matud ni Mayor Rama.