Ang pabaon nga minilyon

Nakalitan ang ubang mga senador sa dihang kalit nga mibotho sa senado ang kanhi budget officer sa kasundalohan nga si Lt. Col. George Rabusa. Si Rabusa nagsilbi isip budget officer sa panahon sa pagka comptroler sa kasundalohan nila ni Jacinto Ligot ug Carlos F. Garcia ug usa upod siya sa naimbistigahan tungod sa kasong gikalambigitan ni Major General Carlos F. Garcia.

Sa senado gibulgar ni Rabusa nga tag lima ka milyon ka pesos ang iyang i-deliver matag bulan sa buhatan ni General Angelo Reyes kinsa nagsilbi nga Chief of Staff sa Armed Forces of the Philippines niadtong panahona. Ang lima ka milyon didto kini kuhaa sa provisions for command directed activities o PCDA. Ang pundo sa PCDA gikan kini sa nagkadaiyang buhatan sa AFP nga gipatampo alang sa nahisgutang buhatan. Ang pundo sa PCDA gastoon kini sigon sa pagbuot sa Chief of Staff nga si Angelo Reyes ug dili subject sa audit.

Gibulgar usab ni Rabusa nga gipabawnan nila si Heneral Angelo Reyes og 50 milyones ka pesos sa dihang miretiro kini sa katungdanan apan hugot kining gipanghimakak sa Heneral.

Tungod sa pasabog ni Rabusa nagkanat-kanat na karon ang imbestigasyon nga gipasiugdahan sa kongreso ug ubang nagpakabana nga ahensiya sa gobyerno.

Dugay ra diay nga nauso sa pipila ka buhatan sa gobyerno ang pabaon sa mga kauban nila nga magretiro sa katungdanan kay dinhi bitaw sa ato gipabawnan man upod og tunga sa milyon ka pesos (500,000.00) sa iyang mga kaubanan sa Board sa Mactan Cebu International Airport Authority si Patricia Roa. Maayo pa sila no? Minilyon ang bawon sa pagretiro.

* * *

Gitapos na sa prosecution ang ilang pagsukit-sukit ni Ruben Ecleo Jr. sa kaso niining giatubang. Si Atty. Mocring Barcenas sa prosecution masaligon nga ilang makonbikto ang pangulo sa PBMA ug kongresista sa Dinagat island nga si Ruben Ecleo Jr. tungod sa pasangil nga pagpatay sa iyang kaugalingong asawa nga si Alona Baculod Ecleo. Apan kun masaligon si Atty. Mocring Barcenas nga ilang makonbikto ang religious leader ug kongresista mas labaw pa usab nga masaligon ang abogado ni Ruben Ecleo Jr. sa pagka absuwelto unya sa iyang kliyente sa kasong giatubang niini.

* * *

Si Atty. Orlando Salatandre nga abogado ni Ecleo wa na mangutana pagbalik sa iyang kliyente human kini sukit-sukita og pangutana ni Atty. Barcenas tungod kay matud pa wa matumpag ang kamada sa ilang depensa ug gani mas milig-on pa kini tungod kay maayo ang pagkapasabot ni Ecleo ngadto sa husgado sa iyang mga tubag sa pangutana ni Atty. Barcenas sa prosecution. Kun si kinsa ang sakto nila, si maghuhukom Pieras ra gayod ang nasayod. Kun sa atong mga mata sad-an si Ecleo, di upod nato kalimtan nga sa mata sa atong balaud inosente pa gihapon siya busa mas maayo seguro nga ato na lang paaboton ang hukom sa hukmanan sa di pa nato siya husgahan.