DSWD: Pag-iisyu ng guarantee letter ng AICS, online na
MANILA, Philippines — Mas padadaliin na ngayon ng Department of Social Welfare and Development (DSWD) ang pagri-release ng guarantee letters sa ilalim ng Assistance to Individuals in Crisis Situation (AICS) ng ahensiya.
Ayon kay DSWD Secretary Rex Gatchalian, ilulunsad na ng kagawaran sa mga susunod na araw ang online system para sa issuance ng mga GLs ng AICS.
“Isa sa mga ginagawa na namin ngayon at ilulunsad na sa lalong madaling panahon, ‘yung automation ng pagbibigay ng guarantee letter. Kasi alam namin kailangan nila [AICS clients] ‘yun para sa mga hospitalization, sa mga burial assistance,” ani Gatchalian.
Aniya pagtalima ito ng ahensiya sa isinusulong na digitalization ni Pangulong Ferdinand “Bongbong” Marcos Jr. sa mga tanggapan ng gobyerno.
dagdag pa ni Gatchalian, oras na mabuksan na ang online portal, matutuldukan na ang mahabang pila sa DSWD para kumuha ng mga GL.
Sa ngayon, nasa fine-tuning system na aniya ang online system.
- Latest
