Namaligya’g anak

CEBU, Philippines — Usa ka kapin 40 anyos nga inahan ang gisikop sa kapolisan kay giingong gibaligya niini ang bag-ohay pang gipanganak nga masuso sa kantidad nga P30,000 diha sa Barangay Duljo Fatima, siyudad sa Sugbo.

Una niini, naukay ang iyang mga silingan ug nagduda kung naunsa ang gimabdos niini kay matud pa mabdos kining mibiya sa ilang balay apan dihang nibalik gamay na ang tiyan apan wala kini dalang masuso.

Nasakpan ang gibuhat sa inahan tungod kay ang usa ka anak niini nanabi sa mga silingan nila nga napalitan sila og cellphone kay gibaligya sa ilang mama ang ilang manghod.

Ang maong tabi-tabi sa mga silingan naabot ngadto sa barangay hinungdan nga gisusi kini sa mga opisyales ug didto nakompirmar nila nga tinuod kini. Gawas pa, duha na ka anak niini ang gibaligya sa maong inahan nga giingong duna say kasayoran ang iyang bana sa iyang gibuhat kay matag mag-away ang duha, sukmatan kini niini bahin sa ilang ikapitong anak.

"Mismo man gyud ang mga anak sa pasyente unya ini’g out daw sa ilang Mama sa ospital kay nanganak daw naa na daw sila'y cellphone kay mabaligya kuno og P20,000 ang iyang manghod unya foreigner daw mopalit, maoy sulti sa mga bata. Ikaduha na ni niya nga pagbaligya kay ang ika-7th niya nga baby nabaligya na gyud," sigon pa ni Gretchen Bucol, silingan ug staff sa Barangay Dulio Fatima nga nahinabi sa GMA Regional TV Balitang Bisdak.

Nailhan na matud pa ang middleman nga maoy ka negosasyon sa inahan. Ang transaksyon gihimo sa dihang gimabdos pa hangtod nga nanganak kini sa pangpublikong tambalanan ug gitugyan ang bata ngadto sa buyer bugti sa bayad nga P30,000.

"Katong bataa (ika-walo) worth P30,000 ang iyang baligya, maoy iyang gisulti namo nga nagbiyahe mi didto sa …," matud ni Catalina Abella, GAD focal sa Barangay Duljo Fatima.

Base sa impormasyon nga nakuha sa Cebu City Police Office, nagbinayranay ang inahan ug ang middleman diha mismo sa hospital niadtong Marso 7.

Giingong P57,000 ang gibayad apan P30,000 lang naadto sa inahan. Gisubay na sa kapulisan kun kinsa ang buyer sa bata tungod kay wala matud pa makaila ang middleman.

"It’s a quite unfortunate and very saddening story indeed, kay mismo ang ginikanan ang allegedly nagbaligya sa ilahang mga anak and this did not happened once, it happened few times," sigon ni Police Lieutenant Colonel Maria Theresa Macatangay, Deputy City Director for Operations sa Cebu City Police Office.

Ang magtiayon nabalhog karon sa prisuhan human sila nangadakpan sa kasong illegal nga sugal.  Gitan-aw na sa kapulisan ug sa Department of Social Welfare and Services ang pagpasaka og kasong trafficking in person batok magtiayon ug sa uban pang nalambigit sa hitabo.  "We assure them that we will be enforcing strictly the law against those who are involved in this particular incident," dugang ni Macatangay.

Gitugyan na sa DSWD Regional Office ang mga anak sa magtiayon. IBM BANAT NEWS