Yano nga graduation gimando sa DepEd sa mga tunghaan
MANILA, Philippines — Gipahibawo sa Department of Education (DepEd) nga ang End-of-School-Year (EOSY) Rites para sa S.Y 2024-2025, alang sa Kindergarten, Grade 6, Grade 10, ug Grade 12 lakip na ang Alternative Learning System (ALS), himoon sa Abril 14 o Abril 15, 2025. Ang EOSY rites karong tuiga nga nagtangag sa tema nga "Henerasyon ng Pagkakaisa: Kaagapay sa Bagong Pilipinas" (Generation of Unity: Partners for the New Philippines), nagpasiugda sa papel nga gihuptan sa mga batan-ong henerasyon sa pagsuporta sa usag-usa ug paningkamot padulong sa usa ka progresibong Pilipinas.
Subay niini gimando sa DepED ngadto sa mga tunghaan nga mag-organisar og yano apan makahulugang seremonyas, nga naglikay sa sobra nga paggasto, mahalon nga sinina, ug paggamit sa mga dagkong venue nga dili kinahanglan.
Ang mga pampublikong eskwelahan kinahanglan mogahin og pondo alang sa mga seremonya gikan sa ilang Maintenance and Other Operating Expenses (MOOE), ug hugot nga gidid-an ang mga kawani sa DepEd sa pagpangolekta og bisan unsang kontribusyon o bayad. Gawas niana, gimando usab sa DepEd nga ang mga certificate of completion ug diploma mosunod sa standard format nga gilatid aron masiguro nga uniform ang tanang mga eskuylahan.
- Latest
