Cebu City, PNP andam sa transport strike

CEBU, Philippines —  Si Mayor Raymond Alvin Garcia sa Dakbayan sa Sugbo nipadayag nga andam kanunay ang kagamhanan sa siyudad kong adunay ipatuman nga transport strike ang sector sa transportasyon.

Kini ang tubag sa mayor kalabot sa gipahigayon nga transport strike ngadto sa kaulohan.

Matud ni Garcia nga makasugakod ra ang siyudad tungod kay adunay mga bus ug transportasyon apan ang pinakaimportante adunay maayo ug nindot nga relasyon ang transport sector ug siyudad.

Si Garcia nagkanayon nga pila na ka higayon adunay mga strike nga nahitabo apan ang mga transport sector sa siyudad wala moapil hinungdan dako kaayo ang iyang pasalamat niini.

Apan kong moapil ang mga transport sector og strike makabalda kini sa serbisyo ug ekonomiya sa siyudad hinungdan nga mapasalamaton si Garcia sa relasyon sa siyudad ug sa grupo sa transportasyon tungod kay dili sila mag-apil-apil.

Subay niini, walay transport strike nga gihimo sa bisan asa nga dalan sa Central Visayas sukwahi sa gihimo sa kaulohan mahitungod sa ilang panawagan nga dili wagtangon ang traditional jeepneys.

Nagkanayon si Greg Perez sa PISTON Cebu nga wala sila'y himuon nga strike tungod kay paabuton nila ang resulta sa ilang diyalogo tali kang Department of Transportation Secretary Vince Dizon karong Biyernes.

Samtang ang Federation of Cebu Transport Cooperative maoy nihimo karon og pagsaba-saba aron madungog ang ilang sentimento.

Subli nga gipadayag sa kooperatiba ang ilang dakong suporta sa public modernization program apan nasagmuyo sila tungod kay hangtud karon wala pay konkretong plano ang gobiyerno sa maong programa.

Gihulagway sa kooperatiba nga long overdue na ang maong pag-finalize sa public modernization program nga gisugdan pito ka tuig na ang nakalabay.

Gikataho nga sa Central Visayas ilabi na sa Sugbo 96 porsiyento sa mga operator ug franchise ang na-consolidate na.

Nasayran usab nga kapin sa 1,100 ka modernize PUJ ang nagdagan karon sa kadalanan sa Sugbo.

Ug kon mahatagan og rehistro ang traditional PUJ maapektohan ang kapin sa 5,000 nila ka empleyado.

Ang maong grupo mopaabot sa ilang yango-ngo ngadto kang kang Transport Secretary Vince Dizon.

Samtang ang Police Regional Office(PRO)-7 andam usab kini kong ugaling adunay transport strike nga ipahigayon.