15 ka balay, gilamoy sa sunog
CEBU, Philippines — Miabot sa 15 ka balay ang naugdaw sa sunog nga miulbo sa Sitio Buli, Barangay Kamputhaw, dakbayan sa Sugbo, kagahapon adlaw nga Martes, Nobyembre 17.
Base sa report sa Bureau of Fire Protection (BFP), alas 1:45 sa hapon nadawat ang alarma ug alas 1:48 sa hapon, naabot sa mga bombero ang lugar ug gisugdan ang pagpalong sa kalayo.
Nakontrolar ang sunog alas 2:28 sa hapon ug gideklarar nga hingpit nang napalong alas 2:36 sa hapon.
Gikatahong nagsugod ni sa balay ni Ruben Hortelano apan nikatap sa mga silingang panimalay. Gibanabana sa BFP nga mokabat sa P210,000 ang kantidad sa kadaot nga nahimo sa sunog. Walay gikataho nga namatay apan dunay pipila nga napaso sa maong insidente.
Nagpadayon ang imbestigasyon sa fire arson investigators aron matino ang hinungdan sa sunog.
Samtang si Kagawad Ramir Salonoy nibutyag nga 18 ka pamilya ang apektado sa maong sunog ug gipahimutang na karon sa kapilya sa Sitio Buli duol sa lugar tungod kay gilayoan sila sa barangay gym.
Ang barangay ug ang City Social Welfare Office mohatag sa pasiunang pagkaon sa mga napektahan.— IBM BANAT NEWS
- Latest
















