Laing kaso batok kang Garcia gibasura sa Ombudsman

CEBU, Philippines —  Laing kasong administratiba nga gipasaka batok kang Cebu City Mayor Raymond Alvin Garcia ang gibasura sa Ombudsman.

Gikataho nga sila si Vicente Esmeña ug Teofilo Rosaroso, Jr. ang nipasaka og kaso  batok kang Garcia lakip ni Leocadio Trovela, direktor sa Department of Interior and Local Government-7, Kristine Joyce Batucan, city administrator ug Henry Tomalabcab, pangulo sa Human Resource Development Office. Gikwestiyon nila ni Esmeña ug Rosarosa ang ilang pagkatang-tang isip mga co-terminus employees sa city hall.

Si Esmeña maoy kanhi pangulo sa Office for Senior Citizens Affairs ug nahimong Security Officer Ill sa Civil Security Unit (CSU) ubos sa buhatan ni kanhi mayor Michael Rama.

Samtang si Rosaroso  maoy kanhi assistant division chief sa Division for the Welfare of the Urban Poor ug nahimong Executive Assistant 1 sa buhatan ni Rama.

Ang duha lakip sa napupos ang kontrata dihang nahukman og perpetual disqualification si Rama niadtong Oktubre sa niaging tuig tungod sa kasong grave misconduct ug nepotism.

Sama sa gisang-at nga reklamo ni Homer Mariano Cabaral, kanhi executive assistant sa OSCA gibasura kini sa Ombudsman tungod sa kakuwang og merito.

Nasayran nga tulo ka kasong administratiba na batok kang Garcia ang gibasura sa Ombudsman apan niining ulahi lang adunay anonymous filer ang nipasaka og samang kaso batok gihapon sa mayor. (BANAT NEWS)