Scammer gipapangita ni Kongresista Gullas

CEBU, Philippines —  Gipapangita ni Kongresista Rhea Gullas sa unang distrito ang tawo o mga tawo nga responsable sa paghimo niya og peke nga account. Si Gullas nakig-alayon sa kapolisan aron mailhan ang tawo nga naghimo og peke nga account aron kini manubag.

Nipadayag si Gullas nga pipila ka mga indibidwal ang nigamit sa iyang pangalan ug hulagway ug namiktima aron makakuha og kwarta. Gikataho nga ang modus sa mangingilad mao ang pagtanyag nila og papremyo nga grocery box ingon man cash assistance bugti sa paghatag og kompleto nga detalye sa ilang mga account sa social media. Matud ni Gullas nga ang mga mangingilad mangayo kini og kwarta sa ilang biktimahon.

Giklaro ni Gullas nga ang ilang buhatan dili mangayo og kwarta sa katawhan.

Giawhag ni Gullas ang katawhan nga magmabinantayon sa mga modus sa mangingilad.