Nasunogan …

CEBU, Philippines —  Nagpasilong kining mga pamilya kauban sa kapin 200 ka pamilyang nawad-an og panimalay human nasunog ang duha ka sitio sa Barangay Paknaan, Mandaue City, Domingo sa gabii.—Joy Torrejos

200 balay sa Paknaan naugdaw sa sunog

Niabot ngadto sa 200 ka mga panimalay ang apektado sa pag-ulbo sa sunog sa duha ka sitio sa Barangay Paknaan, Dakbayan sa Mandaue, Domingo sa gabii, Marso 23, 2024.

Nagsugod kini sa Zone Sili ug Zone Talong sa maong barangay nga naglambigit og mga kabalayan.

Giingong nagsugod kini sa giabangang balay ni Joseph Amistoso Pacaldo. Hingpit kini napawong alas-10:37 sa gabii ug nagbilin kini og gibanabanang P3 milyones.

Wala hinooy gikataho nga nakalas o naangol atol sa pag-ulbo sa maong sunog, gawas lang niadtong call center agent nga nadasmagan sa trak sa bombero sa eskina AC Cortes ug Plaridel Sts.sa Barangay Cambaro. Ang bombero padung sa sunog sa Paknaan.

Si FO1 Neil Ian Amancio, ang fire Investigator uban sa ilang ground commander Fire Superintendent Arnel Abella padayon pa sa ilang imbestigasyon sa hinungdan sa pag-ulbo sa sunog.

Hagip-ot kaayo ang dalan sa maong dapit ug gani adunay mga residente nga namato ug namutol sa ilang fire hoses kay gusto nilang unahon ang ilang dapit nga pasiritan og tubig.

Si Amancio, nitug-an wala man untay problema dili kung dili motabang ang mga tawo apan dili lang unta magsamok-samok sa mga bombero.

Ang kagamhanan sa Dakbayan sa Mandaue pinaagi sa Mandaue City City Social Welfare and Services niapud-apod na og family kit ug mga pagkaon sa mga nasunogan subay sa mando ni Mayor Glenn Bercede.

Gihimo na usab sa CSWS ang profiling aron masayran kung kinsa ang mga pamilya nga apektado sa sunog ug mapadali ang paghatag sa ilang financial assistance nga ilang gikinahanglan.

Adunay dili mominos sa 244 ka mga pamilya  o 1,000 ka individual ang apektado sa maong sunog. (BANAT NEWS)