Luna nga balhinan sa buhisan elem school giproseso na

CEBU, Philippines —  Kagamhanang lokal sa Dakbayan sa Sugbo, nipadali karon sa pagproseso sa luna nga kabalhinan sa pampublikong tunghaan sa Barangay Buhisan nga namilegro sa posibleng pagdahili sa yuta.

Kini human ang City Disaster Risk Reduction Management Office CDRRMO nirekomendar nga ipaubos sa state of emergency ang Buhisan Elementary School tungod sa delikadong kahimtang niini.

Nagkadagko ang mga liki sa edipisyo ug luna sa mismong tunghaan nga gikabalak-an nga modahili ilabi na panahon sa ting-uwan.

Bisan og nihimo ang tunghaan og mga pamaagi sa pagtudlo nga dili maapektohan ang mga tinun-an apan nag ungaw gihapon sila sa kakuyaw.

Ang barangay Buhisan aduna nay nakita nga luna nga kabalhinan, taod-taod na apan natanggong ug wala gayud makairog. Si kapitan Gremar Barete, nipadangat niini ngadto sa CDRRMO ug gihimoan na og lakang ni Cebu City mayor Raymond Alvin Garcia. Si Garcia ang nimando gilayon nga himoong prioridad ang pagproseso sa luna nga paliton sa siyudad aron himoong relocation sa eskwelahan.

Sumala pa ni Garcia, adunay kakuhaan og pundo nga magamit sa pagpalit sa luna busa gamiton kini kong mahuman ang proseso nga agian.

Gipasalig hinoon sa mayor nga dili na matanggong ang maong proyekto alang sa kaluwasan sa mga tinun-an.