Pagpangbuhat og paltik sa Danao ipahunong sud sa usa ka buwan

CEBU, Philippines —  Gihatagan ni Police Regional Office(PRO)-7 Director Brigadier General Redrico Maranan og usa ka buwan ang hepe sa Danao City Police Station sa pagdakop sa tanang illegal nga mamuhatay og armas sa siyudad.

Ang maong direktiba gihimo tungod sa pagkasikop sa tulo ka tawo nga giingong sakop sa gunrunning syndicate atol sa buy-bust operation sa Regional Special Project Unit(RPSU) ug Regional Mobile Force Battalion (RMFB)-7 sa Barangay Suba, Danao City niadtong Marso 21, 2025.

Tulo ka kalibre .45 nga armas ug usa ka submachine pistol ang na-recover sa kapulisan samtang padayon nga gipangita ang usa ka kanhi barangay kagawad nga apil matod pa sa maong sindikato.

Gihulagway ni Maranan nga ang maong sindikato nalambigit sa pagpamaligya, paghimo ug pag-manufacture og loose firearms dili lang sa rehiyon apan apil na sa ubang bahin sa Pilipinas.

 Padayon ang imbestigasyon sa PRO-7 kung unsa kalapad ang operasyon sa maong sindikato.

Gimando ni Maranan sa hepe sa Danao City Police Station nga dakpon ang tanang nalambigit sa paghimo og mga paltik sa maong siyudad.

"Base on policy pagka hindi niya nahuli yung mga gumagawa diyan sa lugar na ‘yan at other units other than Danao City Police Station ang nakahuli, meron siyang tinatawag na command responsibility. And pag ikaw may violations sa command responsibility then you will be administratively relieved," tubag ni Maranan dihang gipangutana kun unsay mahitabo kun dili matuman ang gihatag nga direktiba.--Decemay P. Padilla/IBM 

Hired killers … Gipresentar sa Cebu City Police Office kining tulo ka giingong gun for hires sa sagunson nga operasyon nga ilang gihimo, ang tulo nalambigit sa pagpatay sa nangaging mga adlaw bugti sa bayad.—Romeo Marantal

3 ka hitmen sikop

Gitumbok nga lider ug mga miyembro sa Nadera Gun for Fire Group ingon man ang mga miyembro sab laing grupo nga Gido Gun For Hire Group ang nangadakpan sa gihimong mga operasyon sa Cebu City Police Office(CCPO) sa miaging mga adlaw.

Ang leader sa Nadera Group nga nadakpan mao si alyas Wilfredo, 23, taga Sitio Camagong, Barangay Lahug, nadakpan sa kapulisan sa Mabolo Police Station 4 sa maong dapit niadtong Domingo sa kadlawon, Marso 23, 2025.

Sunod nga nadakpan ang iyang mga sakop nga silang alyas Jerson, 25 anyos, taga Paradise 2, Barangay Kinasang-an niadtong Lunes sa kadlawon, Marso 24, 2025.

Nadakpan sab diha sa Barangay Sambag 2 ang miyembro matud pa sa Gido Gun for Hire Group nga si alyas Garan, 38, nagpuyo sa naasoy nga barangay niadtong Domingo sa kadlawon, Marso 23.

Nagkanayon si Police Regional Office(PRO)-7 Director Brigadier General Redrico Maranan nga nalambigit sa dili momenus napulo ka insidente sa pagpamusil sa milabay nga adlaw ang grupo.

 Si Cebu City Police Office Acting Director Colonel Enrico Figueroa mibutyag nga kontratahon ang mga suspek aron patyon ang usa ka indibidwal bugti sa suhol.

Giingong sagad sa mga target sa grupo mga nalambigit sa ilegal nga drugas nga nakadispalko o kaha wala maka remit sa halin sa illegal nga drugas. 

Ang mga armas nga na-recover gikan sa tulo giingong mga paltik nga gikan sa Danao City.

Si alyas Garan mitug-an nga 16 ka tuig na siya nga hitman, samtang si alyas Wilfredo nga leader sa Nadera group miingon nga sa miaging tuig palang siya nagsugod apan miangkon nga pito na ka tawo ang iyang napatay.

Bayran matod pa sila og P30,000 ngadto sa P60,000 kada tawo nga mapatay nila.  Ang uban magtunga sa bayad sa drayber sa motorsiklo nga ilang sakyan. Samtang si alyas Wilfredo mihimakak sa gipasangil nga pito na ang iyang napatay, gikorihian niya ang mga polis sa pag-ingon nga tulo ra ang iyang napatay tungod sa atraso sa illegal nga drugas bugti sa P30,000 nga bayad.

Palawman sab nila ilang imbestigasyon kay wala gisalikway sa PRO-7 ang posibilidad nga gigamit sab sila sa politiko. (BANAT NEWS)