Nadasmagan sa bombero patay
CEBU, Philippines — Patay ang usa ka 23-anyos nga lalaki human kini giingong nadasmagan sa niresponde nga fire truck sa bombero nga padung sa sunog sa Barangay Paknaan, Dakbayan sa Mandaue, Domingo sa gabii, Marso 23, 2025.
Ang insidente nahitabo sa may eskina sa A. C. Cortes ug Plaridel Street, Barangay Cambaro, Mandaue City.
Ang biktima naila nga si Juan Paulo Mindo, call center agent, taga Sitio Sunlot, Barangay Calawisan, Lapu-lapu City, nagmaneho sa Yamaha Mio Aerox nga adunay plate number G702RA. Ang TEAM nidangop sa buhatan sa kapulisan aron sa pagtugyan sa driver’s license lakip ang OR ug CR sa biktima.
Base sa inisyal nga taho ang biktima nagsubay sa may A.C Cortes padulong sa Lapu-Lapu City samtang ang fire truck padulong sa norte aron moresponde sa alarma sa sunog sa Barangay Paknaan, apan pag-abot sa eskina nagkabanggaanay ang duha.
Gideklarar nga dead on arrival tungod ang biktima pagabot sa tambalanan.
Ang tigpamaba sa Mandaue City Police Office Police Lt. Col. Mercy Villaro, nibutyag nga magpaabot pa sila sa kabanay sa biktima kung mopasang-at sila og kaso.
Dugang pa ni Villaro, ang driver sa fire truck nitahan na sa iyang kaugalingon ug naa sa kustodiya sa kapulisan. Si Villaro subling nipahinumdom sa mga motorista nga maghinay-hinay sa pagmaneho ug mobalik sa basic nga "stop look and listen" ilabi na kun naa sila sa mga eskina. Kini bisan pa og go ang signal sa intersection kinahanglan gihapon nga mominor ilabi na kung naay madungog nga nagpadulong nga mga emergency vehicles nga kinahanglang prayoridad nga makauna o makalusot.
Si FO1 Neil Ian Amancio, ang fire investigator sa Mandaue City Fire Department, niawhag sa mga motorista nga sa higayon makadungog sila ug naay mga siren sa fire truck , ambulansiya ug uban pang emergency vehicles kinahanglang mo-yield o paunahon sila. (BANAT NEWS)
- Latest
