Oplan bulabog sa CCPO magpadayon

CEBU, Philippines —  Nagpahigayon og One Time Big Time Oplan Bulabog ang Cebu City Police Office(CCPO)sa mga Barangay nga sakop Police Stations 5, 6, 7 ug 11 niadtong Biyernes sa gabii hantod na sa kagahapon sa kadlawon nga niresulta sa pagkasikop sa pipila ka mga indibidwal.

Dili lang mga police ang nagpahigayon sa Oplan Bulabog apan apil na ang mga barangay tanod ingon man pipila ka mga departamento sa Cebu City Government, mga Barangay Officials ug uban pa.

Butang nga gikalipay ni Cebu City Police Office Director Colonel Enrico Figueroa ug nagpasalamat kini sa suporta nga gihatag sa LGU kanila aron mamemtinar ang kahapsay ug kalinaw sa Cebu City.

"Ito po ay gagawin natin ng madalas at ita-target lang natin yung mga locations kung saan may krimen na nagaganap mas mataas na krimen, tatargetin natin ang apat na locations na buhos ang ating personnel, buhos ating resources at gagawin natin ‘yun palagi," sigon ni Figueroa.

Sa One Time Big Time Oplan Bulabog personal nga nikuyog si Police Regional Office-7 Director Brigadier General Redrico Maranan. Gibulabog nila ang Sitio Bato ug Sitio Kastilaan, Barangay Ermita ug naka recover sila og illegal nga drugas ingon man armas.

Naagian nila ang suspetsado nga si alyas Jayson, 32 anyos, nagpuyo sa Sitio Lutaw-Lutaw, Barangay Sto. Niño nga nakuhaan og drugas nga nibalor og kapin P600. Giangkon sa suspect nga iyaha ang drugas ug tiggamitan siya.

Samtang laing nadakpan sa kapulisan mao si alyas Romar, 24 anyos, nagpuyo sa Sitio Ermita Proper, Barangay Ermita nga nakuhaan og kalibre .38 revolver ug duha ka basiyo sa tambor niini.

"Ayaw mo pagdala og armas, bawal man ni, bawal, wala kayong lisensiya," pagpasabot ni Maranan.

Gawas niini, usa sab ka 17-anyos nga lalake ang na-rescue sa Mambaling Police Station 11 kay nagdala-dala og kalibre .38 nga revolver nga dunay duha ka bala ug drugas nga 10.25 grams nga nibalor og P69,700 sa ilang Oplan Bulabog sa Sitio Naba, Barangay Mambaling.

Talisay City

Sa pikas bahin, 600 ka indibidwal ang nasita sa gihimo nga Oplan Bulabog ug Oplan Bakal Sita sa kapolisan sa Syudad sa Talisay sud sa upat ka adlaw.

Kini maoy gibutyag ni Police Lt. Col. Epream Paguyod, hepe sa kapolisan sa Talisay.

Si Paguyod niingon nga gisugdan nila ang operasyon niadtong Biyernes sa gabie uban ang direktor sa Cebu Police Provincial Office (CPPO) nga si Police Col. Jovito Anatacio.

Nagkanayon si Paguyod nga nagkalain-lain nga ordinansa ug nasudnong balaod ang ilang gipatuman sa mga tawo nga padayon nga naglaroy-laroy sa lawom na nga kagabhion.

Matud pa ni Paguyod nga ang uban nakabayad sa multa subay sa ordinansa nga gidili ang pag inum og ilimnong makahubog sa publiko nga lugar, pagpanigarilyo, paghubo-hubo sa senina ug uban pa.

Pero aduna sab silay nadakpan nga nagdala og armas. Lakip na dinhi ang pagpapauli sa mga menor de edad nga naa gihapon sa nagkalain-laing establishemento ug nagpaso-paso pa sa kadalanan sa lawom na kagabhion.