VP Sara, lumipad patungong The Netherlands
MANILA, Philippines — Agad na lumipad patungong The Netherlands si Vice President Sara Duterte kahapon ng umaga kasunod nang pag-aresto sa kanyang amang si dating Pang. Rodrigo Duterte.
Ayon sa Office of the Vice President (OVP), umalis ng Maynila ang bise president, alas-7:40 ng umaga kahapon, lulan ng Emirates flight No. EK 337, patungong Amsterdam.
Nabatid na magtutungo ang bise presidente doon upang makipagkita sa legal team ng kanyang ama at talakayin ang kasong crimes against humanity na kinakaharap nito sa International Criminal Court (ICC).
Kabilang sa inaasahang tatalakayin nila ay ang mga legal na opsiyon na maaaring gawin para sa dating pangulo.
Hindi na rin naman nagbigay ng ibang detalye hinggil dito ang OVP.
Matatandaang inaresto ang dating pangulo kamakalawa paglapag niya sa Ninoy Aquino International Airport (NAIA) galing ng Hong Kong at matapos ang 12 oras na detensiyon sa Villamor Air Base ay isinakay sa isang chartered flight patungong Dubai, alas-11:03 ng gabi.
Pinahintulutan siyang magsama ng tatlong tao kabilang dito si dating Executive Secretary Atty. Salvador Medialdea.
- Latest
