Sumbalik sa kabastos
Sunod sa abundang pamalikas, napuno ang mga diskurso ni kanhi Presidente Rodrigo Duterte sa wala pa, atol ug human sa iyang pagtungkawo sa Malakanyang sa pagbinastos sa kababayen-an. Gikan sa pag-insistir nga siya isip mayor sa Davao City maoy unang molugos sa langyaw nga madre ngadto sa pagpanalipod sa katungod sa mga lalaki pakig-relasyon sa mas daghang kababayen-an.
Gani, sa iyang diskurso sa Hong Kong niadtong Domingo, duha ka adlaw sa wala pa dakpa, nitanyag siyang pakaslan ang tanang dalagang Overseas Filipino Workers bugti sa ilang paghatag og kuwarta niya.
-o0o-
Mao nga dakong tamparos sa kaubos sa iyang pagtan-aw sa kababayen-an, ug hinaut nga matugkad niya ang kamakahuloganon sa detalye, nga mahimong iyang nataligam-an tungod sa kapaspas sa mga panghitabo nga niresulta sa iyang pagkabalhog sa prisohan sa The Hague, nga pulos babaye ang tulo ka mga huwes sa International Criminal Court (ICC) nga nisugo sa pagluwat og warrant of arrest batok niya:
•Iulia Antoanella Motoc, ang presiding judge sa Pre-Trial Chamber I nga taga Romania;
•Reine Alapini-Gansou nga taga Ivory Coast; ug
•Socorro Flores Liera nga taga Mexico.
-o0o-
Giawhag si Duterte nga, sa mas daghang oras sa pamalandong sa pag-inusara sa iyang selda sa mosunod nga mga adlaw, sa pagtikad og luna sa tig-a niyang kasingkasing aron mo-angkon sa iyang kasal-anan ug mangayo og pasaylo sa iyang mga biktima. Apil ang kababayen-an sa mga biktima sa bangis niyang pagpanggukod:
•Kanhi Senador Leila de Lima nga iyang gipapriso sulod sa kapin sa unom ka tuig ginamit ang pekeng mga ebidensiya;
•Kanhi Chief Justice Maria Lourdes Sereno nga iyang gimaniobra nga laktod nga napalagpot sa Korte Suprema; ug
•Kanhi Bise Presidente Leni Robredo ug Senador Risa Hontiveros nga iyang gipakiha og sedisyon.
-o0o-
Ambot nakaamgo na ba si Duterte sa kadako sa papel nga gihuptan sa kababayen-an sa pagmatuod nga bisan sa iyang kahawod madutlan sa balaod ug manubag sa mga biktima sa gipasiugdahan nga laktod nga pinatyanay:
•Babaye nga kanhi prosecutor sa ICC, si Fatou Bensouda, ang isog nga nagsugod sa imbestigasyon bisan sa mga panghudlat ni Duterte; ug
•Babaye ang kinatas-an karong opisyal sa ICC, si Judge Tomoko Akane sa Japan.
- Latest
