Kapin P1 milyong shabu nasakmit sa managlahing operasyon
MANILA, Philippines — Nasakmit ang kapin usa ka milyon ka pesos nga shabu gikan sa High Value Individual (HVI) nga pusher atol sa buy bust operation sa mga sakop sa City Drug Enforcement Unit (CDEU) sa Lapu-Lapu City Police Office (LCPO) diha sa Barangay Babag sa miaging gabii.
Si Police Major Jomarie Javier team leader sa CDEU nga naghimo og buy bust operation miingon nga ilang nadakpan ang 38 anyos nga si alyas “Poloy” nga molopyo sa Barangay Jaclopan sa Siyudad sa Talisay.
Matud pa ni Javier nga nakahipos sila og kasayuran bahin sa illegal nga kalihokan sa maong dinakpan gikan usab sa ubang pusher nga una na nilang nadakpan sa buy bust operation nga ilang gipahigayon.
Samtang ang kapolisan sa Presinto 4 sa Mandaue City Police Office (MCPO) ang nakasikop usab og construction worker nga pusher og shabu.
Si Police Major Eric Gingoyon miingon nga ilang nadakpan si alyas “Pepe” 40 anyos nga molopyo sa Barangay Casuntingan niadtong miaging gabii atol sa ilang operasyon.
Nakuha gikan sa maong dinakpan ang nagkantidad og P170,000 nga shabu gikan sa pusher nga taga Barangay Tabok siyudad sa Mandaue.
Gitanggong na ang mga dinakpan ug gikatakdang ipasaka ang tukmang kaso karong Lunes, Marso 24, 2025. (BANAT NEWS)
- Latest
