Gun for hire nga bag-ohay lang nakapatay nadakpan

CEBU, Philippines — Nadakpan sa Labangon Police Station sa Cebu City ang gitumbok nga supetsado sa pagpamusil nga nahitabo sa Barangay Tisa ug gitumbok sab nga gun for hire nga ex-convict atol sa gihimong buy-bust operation sa Purok Sambag, Barangay Tisa, siyudad sa Sugbo, Sabado sa gabii.  Ang suspetsado mao si Crisinciano Dionson Maranga Jr. alyas Pangga, 44, residente ra sab sa naasoy nga lugar.

Nakuhaan ang suspetsado og mga pinakete sa gituohang shabu nga nitimbang og 25 gramos nga nagkantidad og P170,000, usa ka .9mm caliber revolver nga dunay duha ka bala.

Nagkanayon si Police Major Eraño Regidor, hepe sa Labangon Police Station nga ang suspetsado maoy responsable sa pagpusil patay kang Jomar Codilla Martin alyas Joshua niadtong Mayo 27, 2024 sa alas-11 sa gabii sa Sitio San Pedro sa maong barangay ug napasakaan na kini og kasong murder tungod niini.Gitumbok sab ang suspetsado nga maoy responsable sa ubang mga pagpamusil sa mga silingang barangay nga sakop ubang police stations apan wala mopasaka og kason ang mga kabanay sa iyang mga nabiktima kay nahadlok nga sila na sab ang targeton.

Giawhag ni Regidor ang mga kabanay niadtong gipamusil sa suspetsado kaniadto nga moadto sa ilang opisina aron mopasaka og kaso.

Gawas sa iyang pagka gun for hire sa usa ka dakong drug personality namaligya usab kini’g illegal nga drugas sa Tisa gani siya ang tinubdan sa ubang mga drug player sa mga silingang sitio matud pang Regidor.

Kalapasan sa Section 11, Article 2 sa Republic Act 9165 ug Republic Act 10591 ang atubangon nga kaso sa suspetsado. (BANAT NEWS)