“Tumba-saging” nadakpan

CEBU, Philippines — Nabun-og ang usa ka 22-anyos nga gipasanginlang kawatan human nakulatahan sa mga tawo kay nasakpan nga nangawat og cellphone ug pitaka diha sa Sugbu Centro, I.T Park, Barangay Apas, Dakbayan sa Sugbo kagahapon sa kaadlawon.

Ang nadakpan mao si Justine Bacaro Vedario, 22, residente sa Barangay Mantoyong, siyudad sa Mandaue samtang ang kauban niini nga nakaikyas naila sa ngalan nga Joseph Casinto, nagpuyo sa Barangay Pasil, Siyudad sa Sugbo.  Samtang ang biktima mao si Bengie Mendez Baya, 32, security guard.

Sa impormasyon sa Mabolo Police Station 4 sa Cebu City Police Office ang biktima kuyog iyahang mga higala nag-inom sa naasoy nga lugar.  Giingong nahubog ang biktima nihukdong kini sa laing lamesa nga makita ra sab sa iyahang mga kauban.

Nakit-an matud pa sa kauban ang mga suspetsado niduol sa biktima nga natulog ug gikuha ang pitaka ug cellphone niini. Ang maong modus gitawag nga ‘tumba-saging’ diin ang biktima sagad mga hubog, panghimulbolan sa mga gamit ug kwarta.

 Nangayo dayon og tabang ang mga kauban ug timing sab nga naay mga polis nga nagpatrolya sa lugar hinungdan nga gigukod ang mga suspek, ang dinakpan ray nakuptan sa mga tawo ug nakulatahan.

Na-recover gikan niya ang pitaka sa biktima apan ang cellphone nga nagkantidad og P7,000 napasa niya sa kauban nga nakaikyas.

Sa laing bahin, usa ka gituohang kawatan ang naaktohan sa usa ka konsehal sa Barangay Kamagayan sa Cebu City nga nag-alsa og dili iyang gamit sulod sa Chibugan sa Kamagayan Food Park, Huwebes sa buntag.

Matud pa ni Konsehal Roy Avila, co-chairman sa Peace and Order sa Barangay, pipila na ka higayon ang ilang barangay nakadawat og reklamo gikan sa mga vendors nga nawagtangan og bangko, lamesa, butane ug uban pa, hinungdan ilaha kini patuyok-tuyokan og tanod.

Nataymingan gayud niya niadtong Huwebes sa buntag nga gialsa sa maong lalaki ang usa sa lamesa sa vendors maong iyaha kining gisikop.  Si Avila nitug-an upat ka vendors na ang nidangop sa ilahang barangay kay nawagtangan og mga gamit sa ilahang mga tindahan sukad sa nilabay nga buwan.

Morekomendar si Avila ngadto sa nagdumala nga butangan og guwardiya ang maong lugar tungod kay dili tanang oras adunay mga tanod sa lugar.  (BANAT NEWS)