Duha ka bata patay sa sunog

CEBU, Philippines — Kritikal ang kahimtang sa usa ka amahan samtang patay ang duha ka mga anak niini nga edad tres anyo ug usa ka tuig human niulbo ang sunog sa ilang panimalay diha sa may Purok 1, Barangay Manga Tagbilaran City sa  Bohol sa miaging gabii.

Ang maong sunog nagsugod alas 8:10 sa gabii ug napawong paglabay sa 20 minutos. Matud pa ni Mayor Jane Yap, sa Tagbilaran City, duha ka bata ang kompirmado nga patay usa ka tuig nga batang lalaki ug usa ka tres anyos batang babaye.

Sumala pa ni Yap, padayon pa nga nakigbisog para mabuhi ang amahan sa mga bata kinsa kritikal karon ang kahimtang sa tambalanan. Matud pa gisungasong niini ang kalayo sa tinguha untang luwason ang iyang mga anak hinungdan sa pagkapaso tibuok lawas, ulo ug nawong.

Sumala pa ni Yap, ang balay nga susama og kamalig sa manag-amahan ginama sa gaay, walay kuryente nga gigamit kay susama lang kini og display area sa mga gamit nga ginama sa kawayan nga maoy panginabuhian sa pamilya.

Naghimo pa og imbestigasyon ang kabomberohan sa hinungdan sa pag-ulbo sa maong sunog. Nakita sa kabomberohan sa sulod sa maong balaay adunay lampara, paint materials, paint thinner, battery sa sakyanan ug uban pa.

Si Yap, nitug-an human nadeklarar nga fire out dali siya nga misusi sa amahan sa tambalanan ug nilahos sa punerarya aron sa pagpahiluna sa mga bata nga nalakip sa kapaig.

Gipasalig sa mayor nga siya ang moabaga sa pagpahiluna ug pagpalubong sa mga bata, pagpa-hospital sa amahan ug pagtabang sa inahan nga makauli aron makatambong sa lubong. 

Mapasalamaton si Yap sa abtik nga pagresponde sa tanan kabomberohan, kapulisan, CDDRMO ug sa mga opisyal sa siyudad.

Giawhag niya ang mga Tagbilaranon nga magbantay kanunay ilabi na sa mga wires sa balay ug sa mga flammable materials nga naa sa sulod sa balay nga sagad hinungdan sa sunog ug labaw sa tanan ang pag ampo sa Ginoo nga ilikay sa mga dautan ug protektahan ang pamilya. (BANAT NEWS)