Delegado sa Russia motambong sa IES sa Kapitolyo

CEBU, Philippines — Ang Probinsiya sa Sugbo mopahigayon og Mini-Suroy-Suroy aron isuroy ang mga delegado gikan sa Russia nga moabot nganhi sa Sugbo karong buwana.

Ang delegado sa Russian isuroy kini ngadto sa mga tourism destination sa lalawigan sama sa mga beach ug dive sites nga gilaoman nga makahatag og maayong impression sa mga bisita nga dili anad sa init nga panahon o tropical.

Ang delegasyon gikan sa Moscow ug Russian Economic and Cultural Powerhouse sa Saint Petersburg Region.

Nasayran nga ang delegado motambong sa International Economic Summit (IES) nga ipahigayon diha sa Kapitolyo gikan Agosto 21-23, 2024 diin usa kini sa mga highlight sa usa ka bulan nga selebrasyon sa ika-455 nga kasumaran sa Probinsiya sa Sugbo.

Sa maong summit hisgotan ang pag-alayon nga himuon sa Sugbo ug Russia alang sa kalamboan sa nagkadaiyang sektor sa panggobiyerno, medisina, turismo, ug pagpalambo sa ekonomiya.

Lakip usab sa highlight sa maong summit mao ang medical symposium uban sa Napolkov Cancer Center sa Saint Petersburg, usa sa pinakadako nga cancer research and treatment centers sa Russia.

Ang kolaborasyon gitakda nga mosubay sa pag-abli sa bag-ong walo ka andana nga Cancer Center sa Vicente Sotto Memorial Medical Center (VSMMC) diin usa sa himuong diskusyon mao ang pagtambal sa cancer ug research.

Gawas sa Suroy-Suroy mosaksi usab ang maong mga delegado sa Pasigarbo sa Sugbosa karong Agosto 25, 2024. BDB BANAT NEWS