Programang Paleng-QR Ph Plus gilusad na

CEBU, Philippines — Gilusad sa kagamhanan sa Dakbayan sa Sugbo ang programang ‘Paleng-QR Ph Plus’ sa Carbon Public Market niadtong Agosto 15, 2024 diin dul-an 2,000 ka manindahay ug kapin sa 1,000 ka drayber ug operator ang gipaabot nga makapahimulos niini.

Ang ‘Paleng-QR Ph Plus’ gipasiugdahan kini sa Department of Interior and Local Government ug sa Banko Sentral ng Pilipinas diin usa kini ka modernong pamaagi sa pagbayad nga wala nagkinahanglan og pisikal nga kwarta gumikan kay nihangop na kini sa digital nga pamaagi.

Alang sa paggamit sa Paleng-QR Ph Plus ang mga mamalitay o kunsomidor, tricycle driver ug mga manindahay malikay na unya sa risgo sa peke nga kwarta ug pagtakod-takod sa mga sakit sama sa COVID-19.

Gani, matud ni Acting Cebu City Mayor Raymond Alvin Garcia nga panahon na nga aduna na gyu’y dakong kausaban sa kinabuhi sa tawo itandi sa kaniadto.

“The launching of Paleng-QR Ph Plus here in our city gives me utmost pride and joy, not only because akoy na-timing nga nahimong acting mayor on this very momentous event but because it was yours truly who pushed for City Ordinance 2682, or the Paleng-QR PH Plus Program for our Cebu City”, butyag ni Garcia.

Matud ni Garcia nga ang pagpatuman sa cashless payment dili trending apan kinahanglan karon sa globalisasyon sa atong ekonomiya.

Ang Dakbayan sa Sugbo maoy sentro sa komersyo ug kultura mao nga kinahanglang hangpon kining maong bag-ong pamaagi sa pagbayad ug pagpamalit sa merkado publiko.

Matud ni BSP-7 Director Anna Clara Oville nga tungod sa Paleng-QR Ph, dili na maproblema ang mga manindahay nga walay ikasukli. Ug kay wala na may kwarta nga kuptan sa mga kamot luwas na ang mga mamalitay batok sa mga kagaw nga uban sa pisikal nga kwarta. BDB BANAT NEWS