Namaligya’g pekeng TIN ug PSA  Birth Certificates nadakpan

CEBU, Philippines — Gisikop sa mga tinugyanan sa National Bureau of Investigation Central Visayas ang usa ka lalaki nga giingong naninda ug nag deliver og peke nga BIR TIN cards ug lakip ang PSA Certificate of Live Birth papers.  Ang pagkasikop sa 29-anyos nga si Romel Panonce, resulta sa hiniusa nga operasyon sa National Bureau of Investigation Central Visayas, National Bureau of Investigation-Cebu District Office ug Bureau of Internal Revenue Central Visayas.

Ang dinakpan residente sa Alaska Barangay Mambling ug giingong maoy naninda og mga peke nga public documents ug mao say mangunay sa pag-deliver niini sa iyang mga kustomer.

Ang pangalan sa maong dinakpan nilutaw human adunay nadakpan ang operatiba sa may Plaridel Street ning Dakbayan sa Sugbo niadtong Agusto 9,2024.

Ang maong dinakpan nangangkon nga tighatud lang kini sa mga BIR TIN Cards gikan ni Panonce hinungdan sa pagpahigayon gilayon sa transaksyon nga giaagi sa online sa kantidad nga 300 pesos alang sa duha ka BIR TIN Cards.

Sa dihang niabot ang dinakpan sakay sa motor aron sa pag deliver sa cards didto na kini siya gidakop sa mga operatiba.  Nakuha gikan niya ang nagkadiyang klase sa mga IDs ug sa pagsusi sa mga otoridad nasuta nga pulos kini mga peke.

Si Panonce gipasakaan og kaso sa NBI-7 ug gipahimangnoan ang publiko nga dili mokuha og mga dokumento online kay kalab-anan niini mga peke. (BANAT NEWS)