Nakadagan nga nag-brief nalang

CEBU, Philippines — Nikaratil og dagan nga nag-brief nalang ug napakyas sa iyang dautang plano ang 41 anyos nga mananagat human ang 31-anyos nga babaye nga iyaha untang gisuwayan niya og lugos sulod sa panimalay niini sa Barangay Dumlog, Dakbayan sa Toledo nakapangayo og tabang sa mga silingan kagahapon sa kaadlawon. 

Sa impormasyon sa Toledo City Police Station, ang suspek armado og kutsiyo ug maoy gigamit paglugit sa sira sa pultahan sa balay sa biktima nga niadtong tungora naghinanok og katulog nga nag-inusara lang kay ang bana niini nanarbaho. Matud pa nakasulod gyud ang suspek ug nitupad sa biktima dayong tion og kutsilyo. Matud pa gihulga niini ang biktima ug gimandoan sa paghubo sa mga sapot.

Tuod man miaksyon og sunod ang biktima sa mando, apan ang suspek nagdali-dali sab dayon og hubo sa iyang gisuot nga sapot ug brief. Pagkakita sa biktima nga nalinga ang suspek nakahigayon kini pagsinggit sa pagpangayo og tabang .

Sa kahadlok sa suspek nga maabtan sa mga tawo, dalidali kining mikaratil og dagan paggawas sa balay, apan demalas kay namay-ungan kini sa biktima kinsa midangop sa Toledo City Police Station.

Ang suspek nadali sab nga nadakpan sa mga polis.

Dihang gipangutana sa imbestigador ang suspect kung nasayod ba kini sa iyang gibuhat kini nihimakak sa pasangil kay matud pa niini wala siya sa saktong panghunahuna adtong tungora. Gatuo ang kapulisan nga nakainom ang suspect dihang iyang gihimo ang krimen. Na-recover ra sab sa otoridad ang kitchen knife nga gigamit sa suspect pagtion sa biktima.

Pasakaan karong adlawa og kasong attempted rape ang suspetsado nga nagtanggong karon sa prisuhan. (BANAT NEWS)