Environmental fee sa Lapu-Lapu gisugdan na sa pagpatuman

CEBU, Philippines — Gisugdan na niadtong Mayo 3, 2024 sa Lapu-Lapu City Environment and Natural Resources Office (CENRO) ang regular nga pagkolekta sa basura diha sa mga pantalan sa siyudad sa Lapu-Lapu.

Suma pa sa pangu sa CENRO, Emeterio Bonghanoy nga gipamutangan nila og mga floaters ang kadagatan sugod sa Barangay Marigondon, aron maoy mo anchor sa mga pump boats aron mabantayan ang ilang paglihok samtang naka dock.

Sa nasayran gisugdan na sa CENRO ang pagkolekta og P100 nga environmental fee gikan sa mga bisita nga mohimo og mga water sports activities.

Ang mga collectors maoy nag man sa mga pantalana aron mangolekta sa maong bayranan.

Subay niini ang matag pump boat gimanduan nga kinahanglan adunay ilang kaugalingong trash bin nga kasudlan sa ilang mga basura.

Lakip sa mga pantalan nga gibantayan mao ang nahimutang sa Punta Ingano, Maribago, Marigondon ug Angasil. Segun sa tahu sa Lapu-Lapu City PIO nga sa pagpatuman sa ordinansa nga nagkolekta og environmental fee, ang kagamhanan sa siyudad nakatigom na og mokabat sa P140,000 nga salapi gikan sa mga turista nga naghimo og water sports activity.

Dugang ni Bonghanoy nga iyang gipakatap ang mga trucks gikan sa ilang buhatan matag adlaw, buntag ug hapon aron masiguro nga makolekta ang mga basura nga gikan sa turista nga nihimo og island-hopping activities. (BANAT NEWS)