P570.7 milyong ilegal drugs ang nasakmit sa PDEA-7

CEBU, Philippines — Niabot na sa P570.7 milyones nga balor sa ilegal nga drugas ang nasakmit sa Philippine Drug Enforcement Agency (PDEA)-7 sa ilang mga operasyon gikan sa Enero 1 hangtod sa Abril 28, 2024.

Base sa datos sa PDEA-7 nakasakmit sila og 83.88 kilos nga shabu, 5.95 grams nga dried marijuana leaves, 12,540 Marijuana Plants ug 205 ampoules sa nalbuphine hydrochloride ang nasakmit nila sa maong mga buwan ug ang tanan niabot og P570.7 million. 

Numero uno nga gitutokan sa PDEA-7 ang pagguba sa mga drug dens nga ilang gihulagway nga breeding ground sa mga kriminal.

Gani sa Central Visayas, 19 na ka drugs dens ang giguba sa PDEA-7 ug 12 niini naa sa Cebu City.

Ang Cebu City maoy gilauman nga daghan og drug dens itandi sa uban, kay daghan man og tawo ug dunay modayo, manarbaho ug uban pa.

Ang pagguba sa drug dens gikonsiderar sa PDEA-7 nga high impact operations.

Sa laing bahin, nadakpan sa PNP Drug Enforcement Group-Special Operations Unit-7 ang usa ka high value individual nga taga Dakbayan sa Carcar atol sa ilang buy-bust operation sa G. Gaisano Street, Barangay Tejero, siyudad sa Sugbo alas-6 sa gabii sa adlaw'ng Biyernes.

Nagtingkagol sa prisuhan ang suspetsado nga si John Rae Tapere, 32, wala'y trabaho ug residente sa Katugasan, Barangay Perrelos, Dakbayan sa Carcar.

Ang suspetsado nakuhaan og 100 grams sa gituohang shabu nga nagkantidad og P680 mil.

Gipaubos sa tulo ka semana nga casing surveillance ang suspetsado human makadawat og impormasyon ang nga tinugyanan sa balaod nga ang suspetsado nalambigit sa pagpamaligya og illegal nga drugas.

Giingong sa Barangay Duljo Fatima makuhaan matud pa og illegal nga drugas ang suspetsado.

Maka dispose matud pa ang suspek og usa ka kilo sa illegal nga drugas kada buwan ug sagad sa operasyon niini kay siyudad sa Carcar.. (BANAT NEWS)