Private surveyor gikuha sa siyudad alang sa pagrekober sa mga sapa
MANILA, Philippines — Adunay private surveyor nga gikuha ang kagamhanan sa siyudad sa Sugbo aron mas mapadali ang pagrekober sa 3-meter easement sa Estero de Parian.
Gitug-an ni retired fire marshall Aderson Comar, Task Force Gubat sa Baha ug river commander nga nagsugod na ang private surveyor sa pag survey sa area.
“Gi-outsource naman ang pag survey…Gasugod na sila last Monday pa, so with this, we expect na mas mapaspas na gyud ning atong pag recover sa three-meter easement,” suma pa ni Comar.
Sa higayon nga maandam na ang technical report sa surveyor si Comar miingon nga ang mga pribadong establisamento makahimo na unya sa pag-redesign sa ilang mga estraktura.
Samtang nihangyo ang kadagkuan sa Commission on Audit Central Visayas nga hatagan sila og lugway sa kagamhanan sa dakbayan sa gihatag nga tagal sa pagguba sa tipik sa ilang estraktura nga naa nahimutang sulod sa 3-meter easement sa Estero De Parian. Kini human ang maong buhatan nakadawat sa final notice gikan sa Task Force Gubat sa Baha nga motuman sila sulod lang sa 72 oras.
Ang officer in charge sa COA-7 Jeremias Bentulan, nipadayag sa iyang gipadala nga sulat sa task force nga nagpahibalo pa sila sa ilahang ulohan nga buhatan alang sa pundo nga ilang gastuhon sa pagpaguba sa ilang koral nga maapektohan sa pagpatuman sa balaod sa easement.
Gawas sa COA-7 lakip usab ang Barangay Tinago ug DPWH-7 sa nakadawat ug susama nga notisya.
Base sa balaod walay gitugotan nga estraktura nga mobarug sa mga luna nga naa ang 3meter easement. (BANAT NEWS)
- Latest
