Mga tinun-an nga nakakita sa pagbinastos sa lalake miadto na sa polis
CEBU, Philippines — Niadto na sa Carbon Police Station 5 ang tulo ka mga tinun-an sa usa ka tunghaan sa siyudad sa Sugbo nga nakakita sa lalake nga naghimo og law-ay nga buhat samtang naglingkod sa foodcourt sa usa ka mall diha sa Natalio Bacalso Avenue, siyudad sa Sugbo niadtong Martes sa hapon.
Matud ni Police Lieutenant Colonel Janette Rafter, Deputy City Director for Administration sa Cebu City Police Office(CCPO) ang maong mga batan-on nakuhaan na og affidavit ug gi-refer na sila sa pink room sa Vicente Sotto Memorial Medical Center alang sa psychological examination. Nagkanayon si Lt. Col. Rafter kung unsa man gani ang mamahimong resulta sa psychological examination magamit kini isip dugang ebidensiya batok sa maong lalake nga padayon pang gipangita sa mga tinugyanan sa balaod.
"unfortunately sa pagkakaron wala pa gyud nato nakuha gyud ang full identity aning tawhana", sigon ni Rafter.
Gumikan kay ang lugar kun asa nahitabo ang pagbinastos dugokanan og daghang tawo wala gisalikway sa kapolisan nga dili taga siyudad sa Sugbo ang maong lalake.
Kini maoy rason nga si Major Libres nihimo gyud og pamaagi sama sa pag-adto sa mga barangay aron mailhan ang maong lalake.
"It may take time but again it's a diligent effort to uncover the identity of this kung kinsa man gani tong tawhana but definitely we will really exert all our best effort aron makuha ning tawhana, mailhan nato ning tawhana ug mapasakaan og tukmang kaso", ni Lt. Col. Rafter pa.
Nanawagan ang kapolisan sa siyudad sa Sugbo sa mga nakaila sa maong lalake nga mo-report sa otoridad aron masulbad ang kaso ug dili na masubli pa ang maong hitabo. — MEL BANAT NEWS
- Latest
