Kapin sa 20 ka establisamento sa Mandaue posibleng masirado

CEBU, Philippines — Higpit nga gi-monitor sa buhatan sa Business Permit and Licensing Office (BPLO) ang mga establisamento sa Dakbayan sa Mandaue sa pagsiguro nga nagbaton sila og  kompleto nga permits.

Atol sa gipahigayon nga pag-inspeksiyon sa mga personnel sa BPLO nasuta nga kapin sa 20 ka establesamento sa siyudad ang posibleng masirado gumikan kay walay mga business permit.

Naglakip sa mga patigayon nga nadiskubrehan nga kuwang sa mga dokumento  ang nagbaligya og ilimnong makahubog diin nagkinahangkan kini og business permits ug license to sell liquor.

Si Walter Jane Lumbre  sa Business Permit and Licensing Office (BPLO) nagkanayon nga nagpahigayon sila og night inspection sa 15 ka establisamento sa matag semana.

Matud ni Lumbre nga ang kadaghanan nga namatikdan og mga kalapasan mao ang mga sari-sari store, clubs, mga stall nga nagbaligya og pagkaon ug uban pa.

Dugang ni Lumbre nga nagpahigayon sila og regular inspection panahon sa gabii aron masuta kong nituman ang mga establisamento sa mga lagda nga gilatid nga naglakip ang pagdili sa pagbaligya og ilimnong makahubog ngadto sa mga menor de edad. — /BDB (BANAT NEWS)