Dul-an libo ka tawo nakapahimulos sa medical mission

CEBU, Philippines — Dul-an sa libo ka mga residente sa Barangay Bangbang, Lungsod sa Cordova Cebu ang naka benepisyo sa libreng Legal Aid, Medical Mission ug Outreach program nga gi organisar sa AKP-Skeptron Alumni of Cebu, Inc-East Branch uban sa pakig-alayon sa SACs Regional and International Chapter ug IBP Cebu City Chapter, kagahapon, adlaw nga Sabado Enero 4, 2025.

Ang Skeptron Alumni of Cebu East Chairman Ricky Branzuela, nibutyag nga ikaunom na nila ka higayon nagpahigayon sa maong kalihukan ngadto sa laing-laing dapit sama sa Bangkal Lapu-Lapu, Caubian, Olango Island ug tulo ka higayon sa Lungsod sa Cordova.

Sumala pa ni Branzuela, ang ilang mga partners sama sa IBP, Doctors ug mga dentist maoy kanunay nilang gikauban matag higayon nga mopahigayon sila sa Legal Aid, Medical Mission ug Outreach Program nga gipasalamatan kaayo sa ilang grupo.

Usa sa ilang mga hagit sa pagpahigayon sa maong kalihukan ang ilang pundo tungod kay dili man tanang sakop sa ilang grupo ang makahatag ilabi na kun ang uban mawagtangan og trabaho o kaha naglisod sa ilang panginabuhi. Gipadayag ni Branzuela, ilang target karon tuiga mao ang pagpahigayon sa optical-300; medical-600; ibp-300; dental-70 nga maoy ilang maserbisyohan.

Kadaghanan sa mga nagpakonsulta sa medical sagul kini mga bata ug tigulang nga nagpakonsulta ug gihatagan sila og mga tambal sa ilang maintenance.

Ang mga nakapahimulos sa mga serbisyo mapasalamaton kaayo tungod kay libre nilang napakonsulta ang ilang gihambin nga mga balatian.

Usa ka ginang ang nitug-an nalipay siya sa maong serbisyo nga natagamtaman human naibtan siya ug ngipon nga dugay na unta niyang ipaibot apan tungod sa kahagip-ot nalangay-langay siya sa pagpa-ibot.

Malaumon ang maong ginang nga daghan pa nga susama nga kalihukan ang ipahigayon sa ilang dapit ug sa mga lugar nga mas labing nanginahanglan sa ilang serbisyo. (BANAT NEWS)