Sobra tulo ka libo ang mobantay sa Sinulog ug Pista Senyor
CEBU, Philippines — Gibutyag sa Cebu City Police Office (CCPO) nga moabot sa 3,000 ka mga police ingon man personnel sa ubang law enforcement agencies ang ipakatap sa Sinulog 2025.
Gani matud ni Police Colonel Antonietto Cañete, City Director sa Cebu City Police Office nga sa Enero 8, 2025, Miyerkules himoon ang send-off ceremony sa mga mobantay sa maong dakong kalihukan nga mahitabo sa ikatulong semana sa buwan sa Enero.
Matud niya mapun-an pa unya kning mobantay tungod kay nagpaabot pa sila sa commitment sa ubang government agencies, community organizations ingon man force multipliers.
Nasayran nga ang Cebu City Police Office nangayo og augmentation sa Regional Mobile Force Battalion moabag sa pagbantay sa mga kalihukan sa Sinulog 2025 sama sa novena masses, fluvial procession, solemn procession ug uban pa.
Sa miaging tuig pa lang subsob na ang pagpangandam sa kapulisan sanglit mao sab kini ang gusto sa Kagamhanan sa siyudad sa Sugbo nga mapangandaman og sayo ang Sinulog 2025 aron han-ay ug hapsay kini nga mapahigayon.
Sa laing bahin, si Konsehal Joel Garganera kinsa maoy Chairman sa Peace and Order sa Sinulog 2025 motabang sab ang mga tanod ug responders gikan sa kabarangayan.
Gibutyag ni Garganera, karon miyerkules ipahigayon ang send-off ceremony sa alas-6 sa buntag diha sa Cebu City Sports Complex nga sugdan sa usa ka Santos nga Misa nga pangulohan sa kaparian sa Basilica Minore del Sto. Niño. (BANAT NEWS)
- Latest
