P8.9 milyong pundo napagawas sa DSWD para sa ayuda sa Canlaon
CEBU, Philippines — Sukad sa pagsugod sa disaster response operations sa Department of Social Welfare and Development (DSWD) Field Office 7 niadtong Disyembre 9, 2024, human sa pagbuto sa Mt. Kanlaon, nikabat na sa 3,250 ka mga benepisyaryo sa Canlaon City, Negros Oriental ang nakadawat og cash relief assistance gikan sa ahensya.
Aron masuportahan ang mga panginahanglanon sa apektadong mga pamilya, ang DSWD pinaagi sa Assistance to Individuals in Crisis Situations (AICS) program, nihatag og P 2,000 o P 3,000 nga one-time cash aid. Gipangunahan sa DSWD-7 Quick Response Team (QRT) ang pag-apod-apod sa hinabang atol sa dungan nga payout niadtong Disyembre 21-22 ug 26-27 sa miaging tuig.
Atol sa payout niadtong Disyembre 21-22, niabot sa 1,732 ka mga family head nga nagpabilin sulod sa evacuation centers ang nakadawat og P3,000 matag usa.
Samtang 818 ka indibidwal nga sakop sa huyang nga sektor, lakip ang mga persons with disabilities (PWDs), senior citizens, ug indigenous people, nakadawat og P2,000, samtang, 700 ka displaced persons kinsa mipili nga mopuyo gawas sa mga evacuation centers nakadawat og P 3,000 matag usa niadtong Disyembre 26-27.
Sa kinatibuk-an, nikabat og P8.9 milyones ang kantidad sa hinabang.
Gawas sa cash assistance, ang ahensya nakahatag usab og mga food ug non-food items, ug technical assistance sa mga LGU sa pag-set-up sa mga evacuation shelter ug pag-manage sa mga donasyon. (BANAT NEWS)
- Latest
