Garcia gusto na nga mauli ang pulpit panels sa Boljoon

CEBU, Philippines — Gitinguha karon ni Gobernador Gwendolyn Garcia nga mahinabi si Arsobispo Jose Palma aron hisgotan ang wala pa mauli nga pulpit panels nga gipanag-iya sa Patrocinio de Maria Santisima Parish sa lungsod sa Boljoon.

Sa pagkakaron ang upat ka pulpit panels naa pa gihapon sa National Museum of the Philippines (NMP).

Usa sa gikonsiderar ni Garcia ang pagpasaka og kaso batok sa mga opisyal sa NMP tungod sa wala pa pag-uli sa maong mga panels.

 “We will call with that meeting with the Archdiocese. I hope Archbishop Palma will be available. I’d like to hear it directly from him” sumala sa gobernadora atol sa live press conference niini sa Kapitolyo niadtong Biyernes, Enero 3, 2025. 

Si Garcia mitumbok sa section 16 sa local government code nga naghatag niya og gahum isip hepe sa usa ka lokal nga kagamhanan nga mohimo og paagi aron mapanalipdan ang kultura ug heritage niini.

Ang gobernador misaway sa giingong pagmagahi sa NMP ug kon nganong wala pa gihapon giuli niini ang maong mga pulpeta nga unang gitaho nga gidonar sa mga pribadong inbidwal ngadto sa NMP.

Apan nasayran nga ang maong mga relihoyosong kahimanan, gipanag-iya sa simbahan sa Boljoon nga gikawat niadtong 1980’s.

Si Garcia sa niaging tuig pa miawhag sa NMP nga iuli sa Boljoon ang maong mga panels tungod kabahin kini sa kultural sa lungsod.

Gipahimangnonan ni Garcia ang NMP nga ubos sa Presidential Decree No. 1612 o Anti-Fencing Law, ang naggunit sa gikawat nga item o butang, mamahimo gihapon nga liable sa pagpangawat bisan pa man kon dili kini maoy mikawat sa maong butang.

Gisubli ni Garcia nga ang maong mga relihoyosong artifact dili pa ma “deconsecrated” ug kadtong mga ilegal nga nikuha sa maong matang sa relihiyosong butang makakomiter og sacrilege o kalapasan sa batok sa mga sagrado nga butang.

Niadtong bulan sa Mayo sa niaging tuig, ang Archdiocese of Cebu ug ang mga opisyal sa NMP nga gipangluhan ni Jeremy Barns nagkasabot nga ibalik sa NMP ang maong mga pulpit panels sa Sugbo.

Sa report sa The Freeman niadtong Agosto sa niaging tuig, si Barns misaad nga iuli gyud sa NMP ang maong mga panels karong tuiga, sanglit gipaubos pa kini nila sa “restoration” diin nagsugod Oktubre 2024 ug modagan og 12 ka semana.

Matud ni Barns nga nihangyo na sya sa national government og P30 milyones alang sa restoration project.

Saad sa director sa NMP nga kon mahuman na ang maong restoration, ibalik dayon nila sa simbahan sa Boljoon ang maong mga panels pinaagi sa usa ka “grand homecoming”. (BANAT NEWS)