P30 milyones ipalit og towing truck giaprobahan sa konseho sa Cebu City

CEBU, Philippines — Giaprobahan sa Cebu City Council ang budget appropriation nga P30 milyones alang sa pagpalit og tow trucks diin posible usab nga usbawan ang towing fees ingon man ang congestion fees.

Si Konsehal Joel Garganera, chairman sa committee on disaster nihatag og pagtugot sa hangyo sa Cebu City Disaster Risk Reduction and Management Council (CDRRMO).

Nalakip sa giaprobahan nga resolusyon ang pagpangayo sa CDRRMC og usa ka brand new unit sa wheeler road wrecker tow truck nga nikantidad og P22 milyones ug laing unit nga nagkantidad og P8 milyones.

Giingong ang nahisgutang budget kuhaon gikan sa account sa Disaster Response and Rescue Equipment ubos sa Local Disaster Risk Reduction and Management Office Capital Outlay 2024.

Ang maong ekipo maoy gamiton alang sa disaster preparedness ug response efforts sa dakbayan.

Nunot niini, si Garganera nipadayag nga gikan sa buwan sa Enero hangtud sa Hunyo 18 niining tuiga ang dakbayan nakatala og 425 ka insidente sa mga sakyanan nga naguba diha lang sa South Road Properties.

Sa mainland o sa city proper sa samang panahon adunay 227 ang natala usab nga insidente.

Si Garganera niawhag kini sa pag-usbaw sa towing charges ug matud usab niini nga sa kasamtangang ordinansa ang P3,000 nga bayronon gikonsidera nga gaan ra kaayo.

Nasayran nga sa  pagkakaron ang siyudad adunay duha lang ka operational vehicles alang sa towing nga mga light vehicle.

Dugang ni Garganera nga angayan na usab nga patas-an sa siyudad ang singil sa towing aron masiguro nga ang mga truck ug sakyanan nga mosulod sa siyudad siguradong susihon ang ilang tagsa-tagsa ka mga drayber. — /BDB (BANAT NEWS)