Balay natumbahan  og buli

CEBU, Philippines — Nagusbat ang mga kwarto ug sala sa usa ka balay sa Barangay Maguikay, Dakbayan sa Mandaue human kini natumbahi sa punoan sa buli kagahapon sa buntag.

Hinuon walay gikataho nga naangol sa maong insidente.

Nasayran nga atol sa hitabo adunay tawo sulod sa balay kinsa usa sa mga nagpuyo (wala magpahingan) nibutyag nga niadtong higayona ang iyang igsuon nga person with disability naghigda sa ilang sala sa ikaduhang andana swerte kay nakabangon kini dihang nahagsa ang buli ug nisuong sa kisame sa balay.

Samtang ang ilang inahan diha kini nagpundo sa balkonahe sa ilang balay ug ang iyang pag-umangkon nga lalaki diha sa kilid nga bahin wala ra maapil.

Ang kwarto sa ubos nga bahin sa balay anaa didto ang iyang anak kauban sa asawa niini ug anak nga puya ug igsuon nga babaye. Ang punoan wala makalahos sa ubos tungod kay nasangit kini sa atop sa ilang sala apan namalhin ang mga tawo sa ubos tungod kay nibuhagay ang tubig sa uwan gikan sa ikaduhang andana.

Ang mga sakop sa City Disaster Risk Reduction and Management Office ang daling niresponde human kini makadawat og alarma sa maong hitabo.

Gituohan nga gumikan sa katiguwangon ug pagsige og uwan ug nihumok ang yuta hinungdan sa pagkatumba sa punoan sa buli.

Ang mga nagpuyo sa balay temporaryong gipabalhin samtang nagpahigayon og clearing operation ang mga sakop sa CDRRMO. — Yves Mae Salinas, PIT Intern/BDB BANAT NEWS