Rebidding sa pagtrabaho sa CCMC ipahunong

CEBU, Philippines — Giawhag karon sa Cebu City Council si acting Cebu City mayor Raymond Garcia nga ihunong usa ang rebidding sa construction sa Cebu City Medical Center (CCMC) nunot sa mga pangutana kabahin sa transparency sa gamiton nga pundo.

Kini gumikan sa mga resolusyon nga gisang-at ni Konsehal Mary Ann de los Santos sa iyang privilege speech atol sa regular session niadtong Miyerkules, Hunyo 26, 2024. Si de los Santos, kinsa nibarog atubangan sa konseho niingon nga ang iyang kabalaka nitumaw human sa pamahayag sa acting mayor sa pagpadayon sa construction sa CCMC.

Sa paglatid sa timeline sa CCMC construction, si De los Santos miingon nga niadto pang 2015 dihang nagsugod ang construction, usa ka tuig human gimando nga i-demolish ang karaang CCMC building ni kanhi Mayor Michael Rama.

Mokabat sa P600 milyones ang balor sa unang hugna sa CCMC nga gi award ngadto sa CE Padilla, usa ka kontraktor nga nagbase sa Manila.

Matud ni de los Santos, kung kanselahon ang proyekto karon ug usbon ang tanan, molungtad kini og mga tuig aron mahuman.

Niadtong 2017, si de los Santos niingon nga dunay gisugyot nga dugang budget alang sa CCMC construction sa kantidad nga P300 milyones isip pagpangandam sa phase two construction sa CCMC. Dugang pa niya nga sa 2019, ang bag-ong napili nga mayor nga si Edgardo Labella, nimando nga paspasan ang pagtukod sa ospital.

Niadtong 2020, nihangyo usab si Cebu City Vice Mayor Rama sa city executive department nga temporaryong ihunong ang bidding sa P500 milyones nga budget alang sa CCMC.

“July 2016, after the 2016 elections, the former mayor Tommy Osmena has continues the CCMC construction with the existing contractor who have been awarded of the project by Mayor Mike Rama in 2016,” matud ni delos Santos

Iya sab gibutyag nga gi-terminate ni Rama ang kontrata tali sa kagamhanan sa siyudad ug sa MECAT construction niadtong 2023, tungod sa kalangan sa pagtrabaho.

Gihangyo usab ni De los Santos Department of Engineering and Public Works (DEPW) nga mosumiter og comprehensive accomplishment report sa inisyal nga construction niadto pang 2015, ug ang mga proseso nga naagian niini.

Nipasaka usab siya og laing mosyon nga naghangyo sa buhatan sa budget officer nga hatagan ang konseho og kopya sa kompleto ug detalyadong accounting sa pundo nga gigasto sa dakbayan alang sa pagtukod sa CCMC lakip na ang pundo gikan sa nagkadaiyang donors. — MEL BANAT NEWS