P26.2 milyones nga tabang pinansyal sa Kapitolyo ngadto sa Isla sa Camotes
CEBU, Philippines — Ang tulo ka mga lungsod sa isla sa Camotes nakadawat og sumatotal P26.2 milyones nga kantidad sa tabang pinansyal gikan sa Probinsiya sa Sugbo.
Si Gobernador Gwendolyn Garcia miturn over sa cheke nga nagkantidad og tag P8 milyones matag usa ngadto kang Tudela Mayor Greman Solante, Poro Mayor Gary Rama, ug San Francisco Mayor Al Arquillano Jr. atol sa Caravan of Services sa Tudela Civic Center niadtong Hunyo 26.
Sa maong kantidad tag P3 million ang gahin alang sa calamity funds sa maong mga lungsod, tag P3 million sab isip subsidiya alang sa pag-apil sa mga lungsod sa Suroy-Suroy Sugbo Enchanting Camotes niadtong Mayo ug tag P2 million ang gahin sa mga lungsod alang sa proyekto sa imprastraktura.
Ang P3 million nga calamity fund gihatag pagtubag sa kadaot nga dala sa El Niño human ang Probinsya sa Sugbo mideklarar og state of calamity.
Samtang 11 ka barangay diin tag tulo (3) ang sa Tudela ug Poro; lima sa San Francisco ang nakadawat og P200,000 matag usa gikan gihapon sa Kapitolyo alang sa ilang tagsa tagsa ka proyekto.
Ang lungsod sa Pilar ug ang 13 ka barangay kapitan nakadawat usab og sumatotal P10.6 million nga tabang pinansyal gikan sa Kapitolyo. (BANAT NEWS)
- Latest
