PRO-7 nipahigayon og kinalit nga drugtest sa mga polis

CEBU, Philippines — Ang Police Regional Office-7 nipahigayon og kinalit nga drug test kagahapon pagsiguro nga ang kapolisan sa Central Visayas wala malambigit sa ilegal nga drugas sa pagsulod sa tuig 2025

Ang kapolisan sa Cebu City Police Office, Mandaue City Police Office, Lapu-Lapu City Police Office, Cebu Police Provincial Office, Bohol Police Provincial Office, Negros Oriental Police Provincial Office, Siquijor Police Provincial Office ug Regional Mobile Force Battalion-7 ang gipubos sa random drug test.

Si Police Lieutenant Colonel Janette Rafter, tigpamaba sa PRO-7 nagkanayon nga ang random drug test regular nga programa sa kapolisan sa internal cleansing.           

"Our officer-in-charge Police Brigadier General Roy Parena has decided nga today is very timely gyud nga mag-conduct ta og in-ana, it's part of our regular program on internal cleansing", matud ni Rafter.

Ang polis nga magpositibo sa drug test mag-atubang kini og kaso ug kon mapamatud-an kini nga tiggamitan og ginadiling drugas posible kining magtaktak sa serbiso.

Nunot niini, adunay 26 ka personnel sa MCPO ang gipaubos sa kinalit nga drug test kagapon apan gi-excuse ang usa kanila tungod kay namatyan.

Kini ang gibutyag ni Police Lieutenant Colonel Mercy Villaro, tigpamaba sa Mandaue City Police Office.

Matud ni Villaro nga ang maong mga personnel gikan sa lain-lain nga police stations ug headquarters sa MCPO ug magpaabot nalang unya sila sa resulta sa gipahigayon nga drug test. (BANAT NEWS)