Cortes niduso og petition sa Korte Suprema

CEBU, Philippines — Niduso og petition for certiorari si dismissed mayor Jonas Cortes ngadto sa Supreme Court kagahapon sa hapon batok sa Commission on Elections ug sa Abogado nga si Ervin Estandarte kabahin sa pagkansela sa iyang certificate of candidacy.

Ang petition for certiorari naglakip usab og aplikasyon alang sa “Extremely Urgent Issuance of a Status Quo Ante Order ug Urgent Motion for the Conduct of a Special Raffle.”

Sa iyang petisyon, si Cortes nipasangil nga ang desisyon sa Comelec nagbase sa sayop nga paghubad sa mga balaod sa eleksiyon nga nagpasabot og dakong abuso sa gahum.

Gikwestyon ni Cortes ang desisyon nga giingong paglapas sa iyang mga katungod sa konstitusyon lakip na ang due process ug ang katungod sa mga Mandauehanon sa pagbotar karong umaabot nga eleksiyon.

Gibutyag ni Cortes nga nagtutok siya sa Supreme Court isip iyang kataposan nga paglaum aron matubag ang iyang mga kabalaka.

Samtang si Atty. Joshua Monsanto, abogado ni Cortes nagkanayon nga nangayo sila og tabang gikan sa Supreme Court ilabi na nga hapit na magsugod ang pag-imprinta sa mga balota.

Gipasabot ni Monsanto nga nag-file sila og Status Quo Ante Order ug Temporary Restraining Order (TRO) aron pugngan ang resolusyon sa Comelec nga nagkansela sa COC ni Cortes alang sa umaabot nga 2025 midterm elections.

Nunot niini, si Cortes nipasangil sa iyang kaatbang nga responsable sa mga kaso nga iyang giatubang karon ug gihulaway niya nga "powerful, well-connected, ug very influential".

 “Klaro naman na ang opponent ko ay bilas ng influential one of the most influential figures in the land, yung mga Ouanos ang kalaban ko”, padayag ni Cortes.

Apan si Bokal Jonkie Ouano nagkanayon nga na-dismissed ug nag atubang og kaso si Cortes tungod kay aduna kini gibuhat nga ilegal ug sayop.

Gihimakak ni Ouano ang mga pasangil ni Cortes ug nagkanayon nga wala siya’y kalabotan niini ug si House Speaker Martin Romualdez.

Niadtong Disyembre 27, 2024 ang Comelec en banc nibasura sa apela ni Cortes sa desisyon sa Comelec Second Division niadtong Disyembre 18, 2024 nga nagkansela sa iyang COC tungod sa "material ug false representation". (BANAT NEWS)