Taliwa sa paghunong sa trabaho, operasyon sa CCMC dili mabalda

CEBU, Philippines — Nonut sa mga diskusyon kalabot sa nagpadayong pagtukod sa Cebu City Medical Center (CCMC), ang officer-in-charge niini nipasalig nga di mabalda ang operasyon bisan pa man sa temporaryo nga pagpahunong sa konstruksyon niini.

Sa pakighinabi sa The Freeman kagahapon (Domingo), Hunyo 30, 2024, si CCMC officer-in-charge, Doctor Peter Mancao niingon nga ang pagtukod sa ikawalo, ikasiyam, ug ikanapulo nga floors sa maong edipisyo gidumala ni Engineer Ricky Dakay.

Si Mancao niingon nga ang pagpadayon sa konstruksyon sa CCMC nagsugod niadtong Marso 2024 ug gipaabot nga mahuman kini sa dili pa matapos karong tuiga.

Gidugang hinuon niya nga ang mga trabaho nakatandog lang sa mga minor nga detalye sa konstruksyon lakip na ang pagbutang sa mga elevator.

"Gihunong naman, gi hold usa. Kay karon, mao man nay gusto ni acting mayor, ang sobra ana (construction) og asa ana," matud pa ni Mancao.

Si Mancao niingon nga sa kinatibuk-an, ang kulang na lang nga bahin mao ang pagkompleto sa paghuman sa ikaupat, ikalima, ikaunom, ug ikapito nga andana.

“Nahuman na ang shell bali for the seven floors, ang finishing nalang...ang seventh floor kay assigned man sa Operation Smile so ang operation smile ang nag finish sa kanang 7th floor,” matud ni Mancao.

Iyang giklaro nga ang private funding accumulation gikan sa Cebu Medical Society (CMS) naglangkob ra sa pagtukod sa ikawalo ngadto sa ikanapulo nga floors.

Sa samang taho, nahinumdum si Mancao nga nakadawat si mayor Rama og mga pledges gikan sa nagkalain-laing pribadong tawo atol sa sunod-sunod nga marketing investment missions niadtong 2022, gikan sa di mominos P100 milyones.

Gipasabot usab ni Mancao nga ang tinubdan sa pundo sa ubang mga andana kabahin gihapon sa giaprobahan nga kantidad sa administrasyon ni Labella.

Sa bahin sa target nga mahuman sulod sa usa tuig, si Mancao niingon nga positibo gihapon siya nga mahimo pa kining matuman ug midugang nga ang ubang mga andana nagkinahanglan lang og mga minor nga trabaho.

“In a way ang hospital is still functioning man karon except nga kuwang lang gyud og accomodation but ga function na sya tanan, credited man gani sya as level 2,” matod ni Mancao.

Sa pagkakaron, si Mancao niingon nga ila nang gitrabaho ang aplikasyon para sa level three accredetation.

Sa pagkakaron, si Mancao niingon nga wala pay contractor ang CCMC. Ang nagpadayon nga trabaho gihimo sa mga salin sa nangaging mga kontraktor. (BANAT NEWS)