Super Health Center sa Brgy Apas gibuksan na
CEBU, Philippines — Magamit na gayud sa katawhan ang P15milyones nga Super Health Center nga nahimutang sa Barangay Apas ning Dakbayan sa Sugbo human hingpit na kining gibuksan kagahapon adlaw nga Lunes.
Mitambong sa kalihukan ang mga opisyal sa siyudad sa Sugbo ug kadagkuan sa Department of Health Region 7.
Ang maong Super Health Center nahuman kini duha ka tuig ang nakalabay apan nalangay tungod sa mga teknikalidad sa luna nga nahimutangan niini hinungdan nga wala maisyuhi kaniadto og building permit ug certificate of occupancy.
Gikalipay ni acting Cebu City Mayor Garcia ang maong kalambuan tungod kay dako kaayo kini og tabang sa katawhan sa North District ug sa mga silingan nga barangay nga mapaduol na kanila ang mga health services.
"Ang tumong ug tinguha sa Supe Health Center is to serve our people and also in neighboring barangays to decongest existing public hospitals," matud pa ni Garcia.
Kabahin sa mga equipment, miingon si Garcia nga wala'y mga gamit gikan sa Department of Health (DOH). Kadaghanan sa mga gamit gikan sa kagamhanan sa siyudad ug ang uban gi-donar sa Chong Hua Hospital.
Mapasalamaton usab ang Medical Director nga mao si Dr. Grace Valdez sa mga mitambong sa kalihukan.
"In this very moment, we are all witnesses to the journey of this learning institution in the priority of giving thus, the quality health services with the populace of Apas," dugang ni Valdez.
Gibutyag sab ni DOH-7 regional director, Dr. Jaime Bernadas ang ilang papel sa maong health center.
"Ang role nato, to technical assistance or advisory or support in terms unsay pwede mahatag sa national government," matud pa ni Bernadas.
Dugang pa niya nga ang maong health center maoy unang Super Health Center nga operational sa Central Visayas.
Lakip sa serbisyo nga ihatag niini mao ang pag atiman sa konsultasyon, primary care ug uban pa. — Jessa Grezil S. Bacus (BANAT NEWS)
- Latest
