Mga pasahero sa Mandaue maka-monitor na sa bus
CEBU, Philippines — Hatagan og tumang kasayon ang mga pasahero nga mag-atang og sakyanan sa kadalanan sa Siyudad sa Mandaue pinaagi sa natigayon nga pagpinirmahay og kasabotan sa kagamhanan sa siyudad ug sa mga nagdumala sa bus nga Good Transport Solutions Incorporated.
Pinaagi sa bag-ong teknolohiya ang Good Transport Solutions Incorporated nakig-alayon sa Mandaue City alang sa programa sa paghatag og hamugaway nga sitwasyon sa mga pasahero pinaagi sa mga modern jeep.
Si Mayor Glenn Bercede ug ang representante sa Good Transport Solutions Incorporated nagpirma og memorandum of understanding aron sa pag-implementar sa programa.
Sa Mandaue City mahimo na nga ma-monitor sa mga pasahero ang nagpadulong nga mga modern jeeps.
Anha sa mga bus stop ipangmontar ang mga monitor aron makabantay ang mga pasahero sa nagpadulong nga bus.
Samtang sa cellphone pwedeng ma-access pinaagi sa google diin i-type lang ang “ctm.goodkredit.com” aron makita ang dagan sa mga modern jeep.
Ang proyekto uban ang Good Transport Solutions Incorporated daku og tabang sa kalamboan sa pagpahapsay sa trapiko ug kahamugaway sa mga pasahero. (BANAT NEWS)
- Latest
