Sugbovlog Challenge balikon sunod tuig

CEBU, Philippines — Human ipahibalo ang mga mananaog sa Sugbovlog Challenge, gipahibalo ni Gobernadora Gwendolyn Garcia nga magpadayon ang kompetisyon sunod tuig, uban sa plano nga maghatag ug pasidungog sa mga mananaog kada kwarter.

Ang Sugbovlog Challenge usa ka programa nga gisugdan sa Kapitolyo aron aktibong maapil ang mga kabatan-onang Sugbuanon pinaagi sa mga Sangguniang Kabataan (SK) Federation sa matag lokal nga pangagamhanan.

Niadtong Disyembre 16, ang province-wide nga kompetisyon mipasidungog sa 10 ka SK Federation isip mananaog, diin matag-usa nakadawat ug P1 milyon alang sa mga proyekto sa imprastruktura ug P100,000 nga cash.

Ang napili nga mga mananaog sa kompetisyon mao ang Toledo City, Carcar City, San Francisco, City of Naga, Pinamungajan, Borbon, Oslob, Consolacion, Ginatilan, ug San Fernando, nga tanan nakadawat sa giingon nga premyo.

Ang lungsod sa San Francisco sa Camotes Island nakadawat og dugang nga P1 milyon human kini mapili nga mananaog sa People’s Choice Award.

Ang lungsod sa Carmen gideklarar usab isip “surprise winner” human sa desisyon sa Kapitolyo nga pasidunggan kini alang sa Best Video award, diin nakadawat kini ug P250,000 nga premyo.

“Ang kining atong mga SK did not know nga duna tay special prize sa Best Video, but I saw nga naningkamot gyud sila,” matud pang Garcia.

“If you saw the mastery and technical aspect of the video sa Carmen, it’ll really shake your and say “wow,” dugang pa niya.

Human sa inagurasyon sa programa, gipahibalo ni Garcia nga dili kini ang kataposan karong tuiga, ug gibutyag nga ang kompetisyon mahimo nang usa ka tibuok-tuig nga kalihokan sugod sunod tuig.

Gibutyag usab ni Garcia nga ang mga premyo alang sa imprastruktura sunod tuig kay padak-an aron mas dako nga partisipasyon ug kadasig sa mga kabatan-onan nga musalmot.

Uban sa plano nga ipatuman ang programa sunod tuig, gihagit ni Garcia ang mga SK officials nga “level up” ang ilang mga performance.

“May I then challenge all of you: continue each of your vlogs. You are selling, you’re marketing, you’re showing the rest of the world just how beautiful, how charming, how dynamic each of your LGUs are,” dugang pa niya. (CEBU NEWS)